Almatyda Qazaq onkologiia jáne radiologiia ǵylymi-zertteý institýtynda «Ókpe qaterli isigi. Ozyq sheshimder» atty halyqaralyq ǵylymi-praktikalyq onlain konferentsiia ótip jatyr, dep habarlaidy QazAqparat.
Jiynyń ashylýynda Qazaqstannyń bas onkology, professor, Qazaq onkologiia jáne radiologiia ǵylymi-zertteý institýtynyń direktory Diliara Qaidarova eldegi onkologiialyq máselege toqtalyp, qaterli isikti erte kezeńde anyqtaý joldary jaily aityp berdi.
«Ókpe qaterli isigi 21 ǵasyrda da mańyzdy máseleniń biri. Jyl saiyn Qazaqstanda ókpe qaterli isiginen 3500-dei adam aýyrady. Sondai-aq jylyna 2 myńnan astam naýqas ómirden ótedi. Kún saiyn 7 adam osy aýrýdan qaitys bolady. Bizge keletin naýqastardyń 80%-y syrqatyn asqynydyrap alǵandar. Sondyqtan búgin isikti erte kezeńinde anyqtaý jáne aldyn alý skriningteri, terapiianyń innovatsiialyq ádisi jaily aitamyz», - deidi Diliara Qaidarova.
Konferentsiiaǵa Italiia, Túrkiia, Ispaniia, Resei, Belarýs jáne Qazaqstannyń onkologiialyq ortalyqtardyń sarapshylary qatysyp jatyr.
«Qazir Qazaqstanda ókpe isigin erte kezeńinde anyqtaý úshin keshendi skiriningti engizgeli otyrmyz. Ol tómen dozaly kompiýter tomografiiasymen jasalady. Bul ádis ókpe ragyn erte kezeńde anyqtaýǵa múmkindik beredi. Sáikesinshe ony emdeý jeńil bolady»,- deidi Bas onkolog.
Konferentsiia sheńberinde torakaldy hirýrgiia boiynsha sheberlik synyptar ótedi.
Shara Qazaqstan Respýblikasy Densaýlyq saqtaý ministrliginiń qoldaýymen jáne «Qazaq onkologiia jáne radiologiia ǵylymi-zertteý institýty» AQ, «Qazaqstandyq onkologtar qaýymdastyǵy» QB uiymdastyrýmen ótip jatyr.
