Foto: ©️ Tengrinews.kz / Turar Qazanǵapov
Buǵan deiin Birikken Arab Ámirlikterinen ekstraditsiialanǵan "ÓKM operatorynyń" burynǵy quryltaishysy Shnar Muqtarova sotta sońǵy sózin aitty, - dep habarlaidy Tengrinews.kz saity.
Astanada sýdia Ibragim Álkenovtiń tóraǵalyǵymen ótken sotta aiyptalýshy Shnar Muqtarova sońǵy sózin aitty.
"Qurmetti sot, maǵan taǵylǵan aiyptar boiynsha óz kinámdi tolyq moiyndaimyn. Jasalǵan qylmysqa ókinemin. Taǵy da qaitalaimyn, men zańnamanyń qyr-syryn bilmedim jáne júrgizilgen rásimderdiń zańdylyǵyna senimdi bola otyryp, birqatar qujatqa qol qoiýǵa kelistim.
Men 2017-2018 jyldary quryltaishy bolyp tabylatyn esep aiyrysý shotyma 920 million 534 myń 552 teńge somasynda dividendter alǵanymdy moiyndaimyn. Osydan keiin 2021-2022 jyldary tekserý júrgizý qajettiligine bailanysty BAÁ-ge bardym", - dedi "ÓKM operatorynyń" burynǵy quryltaishysy.
Shnar Muqtarova elden ketken kezde qylmystyq is týraly bilmegenin aitty. Sottalýshy sońǵy sózinde bas bostandyǵynan aiyrýmen bailanysty emes jaza taǵaiyndaýdy surady.
"Tutqynǵa alynyp, ispen tolyq tanysqannan keiin men alynǵan dividendterdi óteý týraly sheshim qabyldadym. Óitkeni olardyń alynýy tabiǵatty qorǵaý zańnamasyna qaishy ekeni belgili boldy. Men olardy eshqaida jumsamai, birden qaitardym", - dep túiindedi sózin Muhtarova.
Sýdia Ibragim Álkenov keńesý bólmesine shyqty. Úkim búgin Astanada jariialanady.
