Oblys ákimderiniń orynbasarlary jalaqy bereshegi máselelerin baqylaýǵa alýy tiis. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa otyrysynda vedomstvo basshysy Birjan Nurymbetov aitty, dep habarlaidy QazAqparat.
Ministrdiń aitýynsha, 2019 jyly 9,5 myń jumys berýshini tekserý nátijesinde 11,3 myńnan astam buzýshylyq joiyldy. 41 myńnan astam qyzmetkerdiń quqyǵy qorǵaldy. Olarǵa eńbekaqy boiynsha 5,4 mlrd teńgeden astam bereshek tólendi. Degenmen, jalaqy boiynsha bereshek problemasy áli de saqtalyp otyr. Ótken jylǵy 31 qańtarǵa bereshek 89 kásiporynda 1,2 mlrd teńgeni qurady. Bankrotqa ushyraǵan nemese ońaltýdaǵy 53 kásiporynda 755 mln teńgeni quraǵan bereshek erekshe alańdaýshylyq týdyrady.
«Eńbek qaýipsizdigi men eńbekti qorǵaýdy qamtamasyz etý — taǵy bir mańyzdy másele. Qazaqstanda 2019-2023 jyldarǵa arnalǵan Óndiristik jaraqattaný men eńbek jaǵdailary ziiandy jumys oryndaryn azaitý jónindegi jol kartasy iske asyrylýda. 2,6 myńnan astam kásiporyn halyqaralyq standarttardy engizdi, 2 myńnan astam óndiristik nysan attestattaldy. Ishki baqylaýdy 15 myńnan astam óndiristik keńes júzege asyrady. Nátijesinde jazataiym oqiǵalar sany 8,8 paiyzǵa tómendedi. Zardap shekkender sany 1 430 adamdy qurady, onyń ishinde 180 adam qaza tapty», – dedi Birjan Nurymbetov.
Birjan Nurymbetov 2019 jylǵy 17 maýsymda Jenevada Eńbek ministrligi Halyqaralyq áleýmettik qamsyzdandyrý qaýymdastyǵymen «Vision Zero» nóldik jaraqattaný tujyrymdamasyn ilgeriletý týraly memorandým jasalǵanyn aitty.
«Respýblikanyń 137 kásiporny osy tujyrymdamaǵa qosyldy. Bul jumysty barlyq óńirlerde jandandyrý kerek. Oblys ákimderiniń orynbasarlaryn eńbekti qorǵaý, jalaqy boiynsha bereshekti baqylaý máselelerin baqylaýǵa alýdy suraimyn», – dep atap ótti ministr.
Ministrdiń aitýynsha, 2019 jyldyń mamyr aiynda eńbek janjaldarynyń aldyn alý jáne sheshý boiynsha keshendi jospar qabyldanǵan. 2020 jylǵy 1 qańtarda ujymdyq sharttarmen iri jáne orta kásiporyndardyń 96,5 jáne shaǵyn kásiporyndardyń 42,7 paiyzy qamtylǵan. Qyzmetkerlerdi qysqartýǵa jol bermeý maqsatynda ákimdikter men óńirler kásiporyndary arasynda ózara yntymaqtastyq týraly memorandýmdar jasalady.
