Niý-Iork federaldy soty Muhtar Ábiliazov pen Ilia Hrapýnovtyń júzdegen milliondardy urlaǵany jáne jylystatqanyna qatysty talaptar «sotta máni boiynsha qarastyrylsyn» dep qaýly etti, - dep habarlaidy "Ult aqparat" Ádilet ministrliginiń saityna silteme jasap.
"2021 jylǵy 29 naýryzda AQSh Okrýgtik sotynyń sýdiasy Elison Neitan Muhtar Ábliazov pen Iliias Hrapýnovtyń ótinishin qabyldamai, barlyq tórt talapty (zańsyz iemdený; negizsiz baiý; menshik quqyǵy jáne Niý-Iorktiń azamattyq praktikasy týraly erejeleri men § 5239 zańyna sáikes talap qoiý) sotqa jiberýge ruqsat berdi. Sýdia Neitan usynylǵan maǵlumattardyń qomaqty tizimin muqiiat zerdeleýdiń negizinde Triadou-dyń AQSh-qa investitsiialaǵan qarajatyn Muhtar Ábliazovtyń urlaǵanyn, keiinnen olardy AQSh-ta Iliias Hrapýnovtyń jáne basqalardyń ádeii jylystatqandyǵyn rastaityn "eleýli dáleldemelerdiń" bar ekenin atap ótti", - delingen habarlamada.
Ádilet ministrliginiń málimetinshe, sýdia Elison Neitan barlyq tórt talapty sotqa jiberý kerek dep sheshti. Sondai-aq, sýdia Neitan Triadou-dyń BTA-dan urlanǵan aqsha Tradestock-qa berilgen nesielerdiń jiyntyǵy bolyp tabylatyndyǵy jáne olardyń keiinnen tolyǵymen qaitarylǵandyǵy týraly ýájin tolyǵymen joqqa shyǵardy. Bul ýájdi qabyldamai, sýdia Neitan Ábliazovtyń BTA-ny aldaý úshin óziniń jalǵan kompaniialaryna jalǵan nesie bergenin egjei-tegjeili aityp berdi (BTA-dan alynǵan "nesieni" odan keiin BTA-dan urlanǵan qarajat esebinen óteý).
"Sýdia Neitannyń kelesi anyqtamasyn atap ótken mańyzdy: "banktiń burynǵy tóraǵasy Muhtar Ábliazov óziniń yqpalyn ózi baqylaityn kompaniialarǵa jalǵan nesie berý arqyly milliondaǵan dollardy urlaý úshin paidalandy. Bul qarajattardyń shyǵý tegine úńilsek, olardyń jasandy kompaniialardyń labirinti arqyly Triadou-ǵa kelgendigi kórinedi. Bul dálelder kez kelgen bilikti alqabidiń Triadou aqshanyń urlanǵandyǵyn bile tura, olardy jylystatýǵa kómektesken degen qorytyndy jasaýyna múmkindik beredi". Sýdia Neitan sonymen qatar derekterdiń "Viktor Hrapýnovtyń qala ákimi bola tura, Almatydan milliondaǵan dollar jymqyrǵandyǵyn" rastaityndyǵyn jáne AQSh-qa salynǵan barlyq aqshanyń izi BTA-ǵa deiin baiqalatyny sózsiz ekenin anyqtady", - dedi vedomstvo ókilderi.
Sýdia Neitannyń Triadou-dyń jedeldetilgen sheshim qabyldaý týraly ótinishin qanaǵattandyrýdan bas tartý týraly sheshimi BTA-nyń óziniń Triadou-ǵa qarsy talap-aryzdaryn jáne Muhtar Ábliazov pen Iliias Hrapýnovtyń quqyq buzýshylyqtarynyń dálelderin Niý-Iork sot zalyndaǵy alqabilerdiń nazaryna usynýyna múmkindik berdi. Endi ótinishhattar qaralyp bolǵandyqtan is sotqa jiberiledi. COVID-19 shekteýlerine bailanysty sońǵy sot otyrysynyń naqty kúni keiinirek belgili bolady.
"QR Úkimetiniń konsýltanty - "Boies Schiller Flexner LLP"-dyń seriktesi Mettiý Shvarts: "talapkerler sottyń usynylǵan dáleldemelerge muqiiat nazar aýdarǵandyǵyn joǵary baǵalaidy. Ábliazov, Hrapýnovtar jáne olardyń sybailastary sot protsesine adal qatysýdan birneshe ret bas tartyp, kóptegen sot qaýlylaryn buzǵandyǵyna jáne dáleldemelerdiń bir bóligin qasaqana joiǵandyǵyna qaramastan, olardyń quqyq buzýshylyq jasaýǵa qatystylyǵyn rastaityn qujattardyń kólemi jetkilikti. Talapkerler bul dáleldemelerdi Niý-Iork alqabiler sotyna usynýdy asyǵa kútýde", ekenin málimdep, qabyldanǵan sheshimdi qorytyndylady", - dedi ministrlik ókilderi.
Niý-Iorktegi "Flatotel" sot talqylaýyna Qazaqstan Respýblikasynyń Ádilet ministrligi (Almaty qalasy ákimdiginiń atynan) "BTA Bank" AQ - men birlesip, bes jyl buryn Ábliazovtyń, Hrapýnovtardyń jáne olardyń qylmystyq sybailastarynyń urlanǵan aqshany AQSh-ta jylystatqany úshin aiyptaý boiynsha bastamashylyq jasaǵan bolatyn.
Ábliazov jalǵan nesie berý arqyly BTA-dan milliardtaǵan dollar urlady, ol úshin ol Qazaqstanda sottalyp, Birikken Koroldiktiń sottary ony kináli dep tanydy. AQSh-taǵy is júrgizý barysynda talapkerler Ábliazovtyń quqyqbuzýshylyqtaryn rastaityn qosymsha eleýli dálelder jinady, sondai-aq kóptegen kýálardyń jaýaptaryn sotta qamtamasyz etti.
