Niý-Iork politsiiasynda qyzmet etetin qazaq azamaty jaily ne bilemiz?

Daniiar Nurtaza. Foto: Jeke muraǵattan/Túrkistan gazeti

Niý-Iork poli­tsiia­synda el arasynda tanylyp úlgergen boksshy Dimash Niiazovtan bólek taǵy bir qazaq azamaty jumys isteidi. Ol - almatylyq Daniiar Nurtaza. Daniiar búginde Niý-Iork qalalyq politsiia depar­ta­mentiniń ofitseri. Er adam Túrkistan basylymyna bergen suqbatynda alyp memlekette qarapaiym jumysshydan politsiia qyzmetkerine deiin qalai óskenin aityp berdi.

Daniiardyń sózinshe, ol AQSh-ta turýdy armandamaǵan. Bul elge tek inisi úshin barǵan eken.

"2002 jyly mektep bi­tirgen inim Kolýmbiia ýniversitetinde oqy­ǵysy keldi. Maqtanǵanym emes, biraq inim – óte talantty jan, matematikadan olim­piadalarǵa qatysyp, júldeli oryn­dar ielengen. Otbasymyzben aqyldasa kele, oqimyn, talpynamyn degen balany be­tinen qaqpai, kerisinshe qoldaý bil­di­reiik dep sheshtik. Onyń ústine, ony bóten elge jalǵyz jibergimiz kelmedi. Oǵan qosa, inimniń oqý aqysyn tóleýdi óz mindetim dep sanadym. Ol kezde men jiyrma jasta bolatynmyn. 

Sóitip, Almatydaǵy joǵary oqý oryndarynyń birinde oqyp jatqan oqýymdy tastap, osynda kelip, jumys istedim. Bastapqyda beinetaspa satatyn salonda jumys istedim. Qolym qalt etken ýaqytta aǵylshyn tilin úiretetin oqý­lyq­tar arqyly til úirenip, oiymdy erkin jet­kizetin, ózgelerdiń aitqanyn qaltqy­syz túsinetin boldym.

Sosyn avtokólikti tu­raqqa qoiýshy bolyp jumys istedim. Keiin­nen daiashylar jaqsy jalaqy ala­tynyn estip, "Baký" meiramhanasyna ju­mysqa turdym. Daiashy bolyp jumys istep júrip, jergilikti ýniversitette týrizm mamandyǵy boiynsha bilim aldym.

Diplom alǵan soń, Delta áýekompaniiasyna klient­terge qyzmet kórsetý bóliminde bes jyl boiy eńbek ettim. Munda júrip kóp nár­seni, ásirese adamdarmen qalai til tabysý kerek ekenin úirendim", - dep áńgimesin bastady Daniiar.

Ol Qazaqstanǵa kólik ákelý isimen de ainalysqan. Bul kishigirim biz­nesi birte-birte ulǵaiyp, úlken kásipke de ai­nalǵan. Alaida Qa­zaqstan Keden odaǵyna kirgennen keiin bul biznesti birjola toqtatqan. 

"Bul qansha jerden tabysy mol kásip bolsa da, zańdy túrde jumys is­teýime múmkindik beretin ári janyma ja­qyn qyzmetpen ainalysqym keldi", - deidi ol.

Sóitip almatylyq azamat bala kúngi armanyn oryndaý úshin iaǵni politsiia qyzmetkeri bolý úshin bul isti shyndap qolǵa alady.

"Kásipkerlikten qol úzgen soń, sol armandy maqsatqa ainal­dyratyn kez kelgenin túsinip, poli­tsiia akademiiasynda oqýǵa túsýge bel bý­dym. "Akademiiaǵa oqýǵa túsý" dep aita salý ońai, negizinen sol akademiiaǵa qabyldaný úshin óte kúrdeli baiqaýdan ótýiń qajet. Onda bir orynǵa 15 adam talasady. Al­dy­men este saqtaý, baiqampazdyq qabiletin tek­seretin testileýden ótip, sońynda psi­ho­logiialyq test tapsyrdym. Emtihannan jo­ǵary ball alǵan soń, fizikalyq emti­han­nan óttim. Biraz salmaqtan sol kezde aryldym (kúlip). 

Negizi, úmitkerlerdiń ba­sym kópshiligi psihologiialyq jáne fi­zi­kalyq testileýden óte almai qinalyp, aqyrynda oqýdan shyǵyp tyndy. Negizi, biz, qazaqtar jan aiamai kúrese bilgen jaýyn­ger, jylqy minezdes halyqpyz ǵoi. Sol minez, sol dala ómiriniń daǵdysy qiyn tap­syrmalardy oryndap, qaýipti synaq­tardan ótip, túrli qiyndyqtardy eńserýge septigin tigizedi.

Sol sebepti politsiia qyz­metkerleri qataryna qosylý úshin barym­dy salyp, tyrysyp baqtym. Jalpy ait­qan­da, politsiia departamentine jumysqa turý úshin 4 jyl ýaqytym ketti", - deidi Daniiar.

Búginde Daniiardyń Niý-Iork qalalyq politsiia depar­ta­mentinde qyzmet etip júrgenine jeti jyl bolǵan. Jumys babynda ol Niý-Iorktegi metroda tolǵaǵy qysqan áieldi bosandyryp alýǵa da kómektesken.

Odan bólek, Daniiar ózi sekildi Niý-Iork poli­tsiia­synda jumys isteitin taǵy bir qa­zaq Dimash Niiazovpen únemi bailanysta ekenin aitady. 

"Dimashpen jumys barysynda bir­­­neshe ret kezdeskenbiz. Odan bólek, onyń shar­shy alańda ótkizgen barlyq kezdesýine ba­ryp, jankúier bolamyn. Ara-tura osyn­da ótetin is-sharalarda da kezdesip qala­myz, únemi bailanystamyz. Men sekildi Niý-Iork politsiiasynda qyzmet ete­tin­dik­ten, ári ultymyz qazaq bolǵandyqtan ekeýimizge ortaq dúnie kóp ekeni aitpasa da túsinikti.

Jalpy, men osyndaǵy Qa­zaq­stan elshiligi nemese qazaqtar uiym­das­ty­ra­tyn is-sharalardan qalmaýǵa tyry­sa­myn. Amerikaǵa kelip, ózgerip ketken túgim joq. Elden jyraq júrsem de, kindik qanym tamǵan jermen bailanysym úzilgen joq, úzilmeidi de", - deidi Daniiar Nurtaza.

Áńgimelesken - Áliia Tileýjanqyzy. Maqalanyń tolyq nusqasyn Túrkistan gazetiniń saitynan myna silteme arqyly oqi alasyz.