Foto: gov.kz
Prezident jańadan qurylǵan sý resýrstary jáne irrigatsiia ministrliginiń basshysyn taǵaiyndady, dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysynyń Jarlyǵymen Nurjan Moldiiaruly Nurjigitov Qazaqstan Respýblikasynyń Sý resýrstary jáne irrigatsiia ministri bolyp taǵaiyndaldy, ol burynǵy atqarǵan laýazymynan bosatyldy", - delingen habarlamada.
Esterińizge sala keteiik, 1 qyrkúiekte Prezident Jarlyǵymen jańadan 5 ministrlik quryldy. Olardyń arasynda sý resýrstary jáne irrigatsiia ministrligi bar.
Nurjan Moldiiaruly Nurjigitov 1967 jyly týǵan. Bilimi - joǵary.
1991 jyly Leningrad aýylsharýashylyq institýtyn "Injener-mehanik", 2008 jyly Jambyl gýmanitarlyq tehnikalyq ýniversitetin "Ekonomika" mamandyǵy boiynsha bitirgen. Tehnika ǵylymdarynyń kandidaty, Qazaq ulttyq agrarlyq ýniversitetiniń qurmetti professory.
Eńbek jolyn 1991 jyly Jýaly aýdany Maksim Gorkii atyndaǵy kolhozynda mehanik bolyp bastaǵan.
Ár jyldary Jambyl oblysy ákimi apparatynyń bas inspektory, bólim meńgerýshisi, Memlekettik qyzmet isteri jáne sybailas jemqorlyqqa qarsy is-qimyl agenttiginiń Jambyl oblysy boiynsha departamenti basshysynyń orynbasary, Jambyl oblysy ákimdiginiń aýyl sharýashylyǵy basqarmasynyń basshysy, Jambyl oblysy ákimdiginiń tabiǵi resýrstar jáne tabiǵat paidalanýdy retteý basqarmasynyń basshysy qyzmetterin atqarǵan. Baizaq aýdanynyń ákimi boldy.
2021 jyly sáýirde Jambyl oblysy ákiminiń orynbasary laýazymyna taǵaiyndaldy.
Al 2022 jylǵy sáýirden búginge deiin Jambyl oblysyn basqardy.
