QR Eńbek jáne halyqty áleýmettik qorǵaý ministri Birjan Nurymbetov Túrkistan oblysynda halyqty áleýmettik qorǵaý salasyndaǵy memlekettik saiasatynyń júzege asyrý barysyndaǵy 2020 jyly atqarǵan jumystarymen tanysty, dep habarlaidy "Ult aqparat".
Respýblika boiynsha tirek-qimyl apparaty buzylǵan múmkindigi shekteýli azamattarǵa kásiptik bilim beretin birden bir mekemeni aralap kórdi.
Túrkistan oblysyndaǵy sapary aiasynda ministr óńirlik jumyspen qamtýdy úilestirý jáne áleýmettik baǵdarlamalar basqarmasynyń «Arnaýly kásiptik kolledjindegi» balalardyń quqyqtary men zańdy múddelerin qorǵaýdy qamtamasyz etý júiesimen tanysty. Bul mekeme memleket qamqorlyǵyna alynǵan ári jasy 15-ten asqan múgedek balalar arasynan kásiptik bilimi bar mamandardy daiarlaýmen jáne eńbek naryǵynyń talaptary men óndiris suranystaryn eskere otyryp daiarlaýdyń sapasyn udaiy jetildirý maqsatynda ashylǵan.
Kásiptik bilim berýdiń oqý baǵdarlamalaryn iske asyrýda arnaýly áleýmettik qyzmetterdiń kepildik berilgen kólemin usynýdaǵy statsionarlyq úlgidegi uiym sanalady. Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde 2020 jyly 74 955 adam jumyspen qamtý sharalaryna qatysqan.
Onyń ishinde jappai kásipkerlikti damytý baǵyty boiynsha 3676 adam Biznes-bastaý jobasy aiasynda kásipkerlik negizderine oqýǵa joldandy. 1 085 adam 3 mln teńgeden bastalatyn shaǵyn nesiemen qamtamasyz etilgen. 8 myńnan asa adam 550 myń teńgeden memlekettik grant alyp, kásibin dóńgeletýde.
Atqarylǵan jumystardyń nátijesinde aimaqta 1037 jańa jumys oryndary ashylyp otyr. Memlekettik jáne úkimettik baǵdarlamalar sheńberinde 64,3 myń jumys oryndary qurylǵan. 3761 adam kásipker retinde tirkelip, biznespen ainalysýda. Basym bóligi, iaǵni 7 myńnan astam azamat mal jáne qus sharýashyly men egin sharýashylyǵyn damytýǵa kirisken. 2517 azamat halyqqa qyzmet kórsetý salasyna bet buryp, tigin, konditer tsehy, shashtaraz, dárihana, sulýlyq salony, avtokólik jóndeý ortalyǵy, jihaz tsehy jáne basqa salada óz kásibin damytýda.
