Halyqtyń tabysyn arttyrý — búkil Úkimet jumysynyń basym baǵyty. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa otyrysynda vedomstvo basshysy Birjan Nurymbetov aitty, dep habarlaidy QazAqparat.
Ministr óz sózinde halyqtyń tabysyn arttyrý búkil Úkimet jumysynyń basym baǵyty ekenin atap ótti.
«2019 jyldyń basynan bastap eń tómengi jalaqy mólsheri 1,5 esege – 28-den 42,5 myń teńgege deiin artty. Bul shamamen 1,3 million adamǵa, onyń ishinde 275 myń azamattyq qyzmetshige tikelei áser etti. Maýsym aiynan bastap biýdjettik sala qyzmetkerleriniń jalaqysy 30 paiyzǵa deiin ulǵaidy. 1 mln-nan astam azamattyq qyzmetshi joǵary jalaqy aldy. Qyzmetkerdiń ortasha jalaqysy 114,5 myń teńgeni qurady», – dedi Birjan Nurymbetov.
Ol, sondai-aq, 2020 jyldan bastap Memleket basshysynyń tapsyrmalaryn oryndaý maqsatynda mádeniet jáne arhiv qyzmetkerleriniń, pedagogterdiń jáne áleýmettik qyzmetkerlerdiń jalaqysy taǵy da orta eseppen 30 paiyzǵa artqanyn atap ótti.
«Sonymen qatar, 2019 jyly 205,6 myń jumys berýshi 1,2 mln-nan astam eńbekaqysy tómen qyzmetkerdiń jalaqysyn orta eseppen 32,7 paiyzǵa arttyrý mindetin óz moinyna aldy. Jalaqyny kóterý monitoringisi únemi júrgiziledi», – dedi ministr.
