Qazaqstan Prezidenti Nursultan Nazarbaev 28-shi Dúniejúzilik qysqy Ýniversiada oiyndaryn ashyq dep jariialady, - dep habarlaidy "Ult aqparat".
«Búgin Uly Dala elinde saltanatty sporttyń – uly merekesi. Jastar saiysyna 57 elden 2 myńnan astam sportshy, myńdaǵan sport mamany men jankúier jinaldy. Sport beibitshilik pen tatýlyqtyń, yntymaqtastyq pen tilektestiktiń simvoly. Qonaqjai Qazaqstan jerine hosh keldińizder!» – dedi Memleket basshysy.
«Jer jahan kóz tikken bul Ýniversiada naǵyz jastyq jigerdiń armany, jarqyn jeńisterdiń bastaýy, bolashaq Olimpiada chempiondarynyń mektebi. Qysqy Ýniversiada Táýelsiz memleketter dostastyǵy aýmaǵynda tuńǵysh ret bizdiń elimizde ótkizilip otyr, bul – bizdiń elimiz úshin mártebe», – dedi Elbasy.
Sonymen qatar, Prezident Ýniversiada qarsańynda Almatyda birneshe sport nysany salynǵanyn aityp ótti. «Munyń bári otandyq sporttyń infraqurylymyna salynǵan investitsiia», — dedi Elbasy.
