Qazaqstannyń Tuńǵyp Prezidenti, Elbasy Nursultan Nazarbaev qazaqstandyqtardy Jeńistiń 75 jyldyǵymen quttyqtady, - dep habarlandy Elbasynyń resmi saitynda.
«Qadirli otandastar! Ardaqty ardagerler! Barshańyzdy Uly Jeńistiń 75 jyldyǵymen shyn júrekten quttyqtaimyn!
9 Mamyr – árdaiym bárimizdiń mereiimizdi ústem etetin kún.
Bul kúni biz adamzat tarihyndaǵy eń surapyl soǵysta jeńiske jetken batyrlardy erekshe qurmetpen eske alamyz.
Maidan dalasyndaǵy jaýyngerlik erlik pen tyldaǵy qajyrly eńbekke taǵzym etemiz.
Bul – naǵyz batyldyqtyń, áskeri dańq pen patriotizmniń merekesi.
Barshańyzǵa belgili, jeńis bizge ońaiǵa túsken joq.
Keler urpaqtyń baqytty ári berekeli ǵumyry úshin milliondaǵan adam fashizmdi jeńý jolynda janyn pida etti.
Ortaq iske Qazaqstannyń qosqan úlesi zor.
Elimizdiń árbir besinshi turǵyny maidanǵa attandy.
Olardyń kóbi soǵys dalasynan oralǵan joq.
Qazaqstandyqtar eren erlik pen bekem birliktiń jarqyn úlgisin kórsetti.
Jaýjúrek atalarymyz Brest qamalyn, Máskeýdi, Leningradty qorǵaýǵa baryn salyp, Stalingrad, Kýrsk shaiqastarynda, jaý basyp alǵan aýmaqtardy azat etýde janqiiarlyqpen soǵysty.
Berlindegi Reihstagqa Jeńis týyn tikti.
500-ge jýyq qazaqstandyq Keńes Odaǵynyń Batyry ataǵyna ie boldy», - delingen quttyqtaýda.
