Búgin Almaty oblysy Kerbulaq aýdanynyń ortalyǵy Saryózek kentinde 900 oryndy jańa mektep paidalanýǵa berildi. «Nurly jol» baǵdarlamasymen salynǵan bul jańa bilim mekemesiniń iske qosylýy nátijesinde buǵan deiin D.Qonaev atyndaǵy jáne № 49 orta mektepterdegi úsh aýysymda oqytý máselesi sheshimin tapty. Bul týraly Almaty oblysy ákimdiginiń resmi saity habarlady.
Mekteptiń ashylý saltanatyna oblys ákimi Amandyq Batalov arnaiy baryp, mektep ujymyn, oqýshylar men ata-analardy quttyqtady.
- El Táýelsizdiginiń 25 jyldyǵy qarsańynda qýanyshqa kenelip, jańa mektepke kirgeli otyrsyzdar. Qýanyshtaryńyz qutty bolsyn! Bul mektep Elbasynyń tapsyrmasymen úsh aýysymdy mektepterdiń máselesin sheshý maqsatynda «Nurly» baǵdarlamasymen salyndy. Kelesi jyly úsh aýysymda oqytý máselesi tolyǵymen sheshimin tabatyn bolady, - dedi oblys ákimi A. Batalov óz sózinde.
Aýdan turǵyndary men ata-analar atynan Almaty oblysynyń jáne Kerbulaq aýdanynyń «Qurmetti azamaty» Tólendi Sarybaev sóilep, jerlesterine izgi tilegin jetkizdi.
Munan soń mekteptiń qurylysyn júrgizgen «Artemida LTD» JShS direktory Salman Aslanov jańa mekteptiń direktory Kamshat Qystaýbaevaǵa ǵimarattyń kiltin tabys etedi.
Jańa bilim ordasynyń tabaldyryǵyn attaǵan talapty oqýshylarǵa Ómirbekov Jaqypbek aqsaqal bata berip, balǵyndarǵa jarqyn bolashaq tiledi.
Aita keteiik, mekteptiń jalpy kólemi - 9859,4 sharshy metr. Ǵimarattyń qurylys jumystaryna, qural-jabdyqtaryna barlyǵy – 1 476,1 mln. teńge, onyń ishinde Ulttyq qordan – 1 330,0 mln. teńge, jergilikti biýdjetten – 146,1 mln. teńge bólingen. Mekteptiń materialdyq-tehnikalyq bazasyn nyǵaitýǵa jergilikti biýdjetten qosymsha taǵy 34 mln. teńge qarajat qarastyrylǵan.
Qazir munda 60 ustaz qyzmet etedi. Búgingi kúni mektep 750 oqýshymen tolyqtyrylyp, 30 synyp jiyntyǵy bekitilgen.
Mektepte ádettegi oqý kabinetterimen qatar jańa modifikatsiialyq úlgidegi, atap aitqanda lingafondy-mýltimediialyq, informatika, himiia, fizika, biologiia, alǵashqy áskeri daiyndyq, tehnologiia jáne sheberhana kabinetteri jabdyqtalǵan. Sonymen qatar 150 orynǵa arnalǵan ashana jáne 2 sport zaly, II qabatynda 18 oqýshyǵa arnalǵan oqyrman zaly, 13 kompiýtermen jabdyqtalǵan kitaphana, 296 oryndyq májilis zaly ornalasqan.
Mektep ǵimaratynyń syrtynda 2752 sharshy metrdi quraityn jańa úlgidegi jasandy gazon tóselgen fýtbol jáne voleibol men basketbol oiyndaryna arnalǵan alań salynǵan.
Mektep aýlasyna el Táýelsizdiginiń 25 jyldyǵyna orai 25 aq terek otyrǵyzylyp, 17 shyrsha, 800 túp raýshan gúlderimen jáne de basqa aǵash túrlerimen abattandyryldy.
