Foto: ashyq derekkóz
Tanymal komik Nurlan Sabýrov 7 aqpan kúni tańǵy saǵat 04:30-da Almaty qalasyna ushyp keledi, dep habarlaidy Ult.kz.
Reseilik Telegram-arnalardyń málimetinshe, ol Máskeýden Almatyǵa áýe biletin óz qarajatyna satyp alǵan.
«Vnýkovo» áýejaiynyń onlain-tablosyndaǵy derekke sáikes, tústen keiingi ýaqytta Máskeýden Almatyǵa ushatyn jalǵyz reis – Scat áýe kompaniiasynyń DV 816 reisi. Atalǵan reis Máskeý ýaqytymen saǵat 21:50-de ushady.
Buǵan deiin búgin Resei Federatsiiasynyń aýmaǵyna Nurlan Sabýrovqa 50 jyl merzimge kirýge tyiym salynǵany belgili boldy. NTV arnasynyń «ChP» baǵdarlamasynyń habarlaýynsha, komik bir kún buryn Dýbaidan Máskeýdegi «Vnýkovo» áýejaiyna kelgen. Alaida pasporttyq baqylaý kezinde ol jeke bólmege jetkizilip, Reseige kirýge tyiym salý týraly resmi qujat tabystalǵan.
Qujatta sheshimniń ulttyq qaýipsizdik múddesinde qabyldanǵany kórsetilgen. TASS agenttiginiń málimetinshe, tyiym salýǵa komiktiń AÁO-ǵa qatysty syn pikirleri, sondai-aq kóshi-qon jáne salyq zańnamasyn buzýy negiz bolǵan.
Aita keteiik, buǵan deiin Sabýrovtyń málimdemelerine bailanysty Reseidiń birneshe qalasynda onyń kontsertteri toqtatylǵan. Sonymen qatar 2025 jyldyń mamyr aiynda ol «Sheremetevo» áýejaiynda Reseide bolý merzimin asyryp jibergeni úshin ustalyp, 5 myń rýbl aiyppul tólep, eki apta ishinde elden ketýge mindettelgen.
Reseilik BAQ-tyń habarlaýynsha, elge kirýge tyiym salynǵannan keiin Sabýrov deportatsiiany kútý aimaǵynda qalyp, Dýbaiǵa keri ushýǵa qarajaty bolmaǵan. Oǵan tegin deportatsiia usynylǵanymen, ushý qolyna kisen salynyp júzege asatyny aitylǵan soń, ol bul nusqadan bas tartyp, Almatyǵa bilet satyp alǵan.
Sondai-aq komiktiń Reseide jalpy quny 60 mln rýblden asatyn múlki, buryn kontsertter uiymdastyrylǵan kompaniiasy jáne az kólemdegi salyq bereshegi bar ekeni aitylady. Kei derekkózder onyń elde qalýyn zańdastyrý úshin deldaldar arqyly áreket etýge tyrysqanyn málimdegen, alaida Sabýrov bul aqparatty joqqa shyǵarǵan.
Nurlan Sabýrovtyń ókilderi tarapynan ázirge resmi túsinikteme berilgen joq.
