Májilis Spikeri Nurlan Nyǵmatýlinniń tóraǵalyǵymen Palatanyń Biýro otyrysy ótip, aldaǵy jalpy otyrystyń kún tártibi naqtylandy, – dep habarlaidy "Ult aqparat".
Aldaǵy sársenbide Májilis depýtattary birqatar ratifikatsiialyq zań jobalaryn qarap, talqylaityn bolady.
Onyń qatarynda Shanhai Yntymaqtastyq Uiymynyń Ekstremizmge qarsy is-qimyl jónindegi konventsiiasyn ratifikatsiialaý týraly zań jobasy uiymǵa qatysýshy memleketterdiń ekstremizmge qarsy is-qimyl yntymaqtastyǵynyń tiimdiligin arttyrýǵa baǵyttalǵan. Bul Konventsiia eki jyl buryn Nur-Sultanda jasalǵan.
Osy kúni depýtattar nazaryna tunshyqtyratyn, ýly nemese basqa da uqsas gazdar men bakteriologiialyq quraldardy soǵysta qoldanýǵa tyiym salý týraly hattamany (Jeneva, 1925 jylǵy 17 maýsym) ratifikatsiialaýǵa arnalǵan qujat usynylady. Qazirgi ýaqytta 140 memleket Jeneva hattamasynyń qatysýshysy sanalady. Zań jobasy Qazaqstannyń Jeneva hattamasyna resmi qosylýy úshin múmkindik jasaýǵa baǵyttalǵan.
Aldaǵy jalpy otyrysta Palata Tájikstan, Qyrǵyzstan, Qazaqstan jáne Ismailitter Imamaty arasyndaǵy Ortalyq Aziia Ýniversitetin qurý jónindegi shartqa hattamany, sonymen birge, Reseimen «Baiqońyr» ǵarysh ailaǵynan ushyrý kezinde tasymaldaǵysh zymyrandardan bólinetin bólikterdiń qulaý aýdany retinde Qazaqstan aýmaǵyndaǵy jer ýchaskesin berý jáne paidalaný sharttary týraly úkimetaralyq kelisimdi ratifikatsiialaýǵa qatysty zań jobalarymen jumysty odan ári jalǵastyrady dep kútilýde.
