Parlament Senaty Tóraǵasynyń orynbasary Nurlan Ábdirov Qaraǵandy oblysynda saparda boldy. Tóraǵa orynbasary jańadan sailanǵan aýyl ákimderimen, sondai-aq Ulytaý jáne Jańaarqa aýdandary máslihattarynyń depýtattarymen kezdesti, dep habarlaidy "Ult aqparat".
Nurlan Ábdirov júzdesýde ótken sailaýdaǵy jergilikti bilik organdarynyń ókilettigi men derbestigin keńeitýdegi mańyzdylyǵyn atap ótti.
«Elimizde aýyl ákimderin sailaý aiaqtaldy. Osylaisha, biz jergilikti atqarýshy organdardyń derbestigin nyǵaitýǵa baǵyttalǵan sailaý protsesiniń birinshi jáne mańyzdy kezeńderinen tabysty óttik. Bul saiasi reformany alǵash ret elimiz Prezidenti Qasym-Jomart Toqaev biylǵy qańtar aiynda Parlament palatalarynyń birlesken otyrysynda jariia etkeni belgili. Memleket basshysy sol kezde azamattardyń sheshim qabyldaý protsesine yqpalyn kúsheitý úshin osyndai serpin berýdiń mańyzdylyǵyn atap ótken bolatyn. Osyǵan bailanysty jańadan sailanǵan ákimderge úlken jaýapkershilik júkteledi» , - dedi Nurlan Ábdirov.
Senat Tóraǵasynyń orynbasary bul tapsyrmany iske asyrý úshin depýtattar aýqymdy zańnamalyq jumysty jedel túrde júrgizgenin eske saldy. Atap aitqanda, jergilikti ózin-ózi basqarý biýdjetin nyǵaitý úshin salyqtar men tólemderdiń keibir túrleri: biryńǵai jer salyǵy, jer ýchaskelerin paidalanǵany úshin tólem, jer ýchaskelerin satýdan túsetin túsimder, jer ýchaskelerin jaldaý quqyǵyn satý tólemi tórtinshi deńgeige berildi. Nurlan Ábdirov bul jańalyqtar aýyldyq, aýdandyq jáne qalalyq biliktiń derbestigin ulǵaitýǵa yqpal etetinin aitty.
Palata Tóraǵasynyń orynbasary jergilikti halyqty tolǵandyratyn ózekti máselelerdi talqylaý jáne sheshý men qoldanystaǵy zańnamanyń tiimdiligin jaqsartý úshin Senat pen máslihat depýtattarynyń birlesken jumysyn kúsheitýdiń mańyzdylyǵyn atap ótti.
Senat Tóraǵasynyń orynbasary kezdesýlerge qatysqan quqyq qorǵaý organdarynyń ókilderine arnaǵan sózinde Memleket basshysynyń bastamasymen ázirlengen, elimizdiń quqyq qorǵaý jáne sot júielerin reformalaýǵa baǵyttalǵan zańdardy qabyldaý depýtattar qyzmetiniń mańyzdy nátijeleriniń biri bolǵanyn atap ótti.
Tóraǵa orynbasary sapar barysynda sondai-aq óńirdegi aýyl eńbekkerlerimen elimizdiń mal sharýashylyǵyn qoldaý máselelerin de talqylady jáne oblystyń aýyl sharýashylyǵy sektorynyń damý problemalarymen tanysty. Jaqynda Qaraǵandy oblysynda bolǵan dala órtiniń saldarymen kúres jáne óńirdiń ondaǵan zardap shekken sharýa qojalyqtaryna keltirilgen zalaldy óteý máseleleri kóterildi. Nurlan Ábdirov keltirilgen zalaldy baǵalaý jáne zardap shekken azamattarǵa ótemaqy tóleý jónindegi jumystardy jedeldetýdiń mańyzdylyǵyn atap ótti.
