Tokio Olimpiadasynyń qola júldegeri Nurislam Sanaev memleket tarapynan beriletin qomaqty syiaqyny muqtaj otbasylar men naýqas balalardyń emine jumsamaq. Bul týraly sportshy jelidegi paraqshasynda jazdy, dep habarlaidy "Ult aqparat".
«Men es bilgeli qiynshylyqty, joqshylyqty kórip óstim. Sol kezdegi bala arman meni biik belesterge jeteledi. Eń alǵash sportqa qadam basqanda olimpiadada top jaryp, muqtaj jandarǵa kómektesý armanym bolatyn. Búgin de sol armanyma qol jetkizip otyrmyn. Memleket tarapynan maǵan beriletin qomaqty syiaqyny men muqtaj otbasylar men naýqas balalardyń emine jumsamaqpyn. Elimizde baqytty otbasylardyń sany kóp bolsyn!», - dep jazdy sportshy jelide.
Eske salsaq, Tokio Olimpiadasynda erkin kúresten 57 kelige deiingi salmaqta qazaqstandyq Nurislam Sanaev qola júldeger atandy. Sportshyǵa Aqtóbe oblysynyń ákimi Ońdasyn Orazalin páter kiltin tabys etti.
