Qazaqtyń áigili kompozitory, kúishi Nurǵisa Tilendievtiń qyzy Dinzýhra Tilendieva súiinshi jańalyǵyn bólisti. Óner iesi otbasynda qýanyshty jaǵdai bolǵanyn aityp, áleýmettik jelidegi paraqshasynda kishkentaiy dúniege kelgenin jariialady, dep habarlaidy ult.kz.
Alaida Dinzýhra Tilendieva sábiiniń ul nemese qyz ekenin ázirge ashyp aitpaǵan. Ol qýanyshty jańalyǵyn kópshilikpen bóliskenimen, balanyń esimi men dúniege kelgen kúni týraly da tolyq aqparat bermedi.
Jeli qoldanýshylary óner iesin qýanyshty jańalyǵymen quttyqtap, sábige aq tilekterin jaýdyrdy. Kópshilik «Baýy berik bolsyn!», «Sábidiń ǵumyry uzaq bolsyn!», «Ata-anasyna qýanysh syilasyn!» degen izgi tilekterin bildirip jatyr.
Dinzýhra Tilendieva – qazaq óneriniń kórnekti tulǵasy Nurǵisa Tilendievtiń qyzy. Ol ákesi negizin qalaǵan «Otyrar sazy» folklorlyq-etnografiialyq orkestriniń kórkemdik jetekshisi ári bas dirijeri qyzmetin atqarady.
Óner jolyn ákesiniń shyǵarmashylyq murasymen sabaqtastyryp kele jatqan Dinzýhra Tilendieva Qazaqstannyń eńbek sińirgen qairatkeri atanǵan. Ol Nurǵisa Tilendievtiń shyǵarmalaryn nasihattap, ulttyq mýzyka óneriniń damýyna úles qosyp keledi.
