Shymkentte 21 jastaǵy Nurai Serikbaidy óltirgeni úshin ómir boiyna bas bostandyǵynan aiyrylǵan Sherhan Aimahannyń qorǵaýshylary sot úkimine apelliatsiialyq shaǵym túsirdi, dep habarlaidy ult.kz.
Bul aqparatty marqumnyń aǵasy Sultan Serikbai men jábirlenýshi taraptyń advokaty Aianhan Omarov rastady. Olardyń aitýynsha, apelliatsiialyq shaǵymnyń berilgeni týraly habarlama «Sot kabineti» arqyly kelgen. Qazir jábirlenýshi tarap qujatpen tanysyp, óz qarsylyǵyn daiyndap jatyr.
«Apelliatsiialyq satynyń ókilettikteri jetkilikti. Ol birinshi satydaǵy sot úkiminiń kúshin tolyq joiyp, jańa sheshim shyǵara alady. Sonyń ishinde aiyptaýdyń jekelegen baptaryn alyp tastaýǵa, jańalaryn qosýǵa nemese jazany jeńildetýge quqyly», – dedi Sultan Serikbai.
Eske salaiyq, 13 tamyzda Shymkent qalasynyń qylmystyq ister jónindegi mamandandyrylǵan aýdanaralyq soty Sherhan Aimahandy asa qatygezdikpen adam óltirý, nekege turýǵa májbúrleý jáne stalking boiynsha kináli dep tanyp, ómir boiyna bas bostandyǵynan aiyrǵan. Sonymen qatar sot ony Nuraidyń otbasyna 25 million teńge moraldyq ótemaqy tóleýge mindettegen.
Sonymen qatar Nurai Serikbaidyń ólimine qatysty sot otyrysynda kýálik bergen Qarataý aýdandyq politsiia basqarmasynyń burynǵy tergeýshisi Ábilǵazy Artyqbaiǵa qatysty jeke qylmystyq is qozǵalǵan. Qazir bul is boiynsha tergeý júrip jatyr.
