Shymkentte qaza tapqan 21 jastaǵy Nurai Serikbaidyń ólimine qatysty qylmystyq is boiynsha tergeý aiaqtalý kezeńine jetti. Bul týraly Ishki ister ministriniń orynbasary Sanjar Ádilov Senat kýlýarynda málimdedi., dep habarlaidy ult.kz.
Onyń aitýynsha, atalǵan is boiynsha tergeý jumystary maýsym aiynda tolyq aiaqtalyp, keiin qylmystyq is materialdary sotqa joldanady.
Eske salaiyq, biyl 11 qańtarda Shymkenttegi kópqabatty turǵyn úilerdiń biriniń mańynan 21 jastaǵy qyzdyń máiiti tabylǵan edi. Kýágerler onyń denesinde pyshaq jaraqattary bolǵanyn aitqan. Keiin politsiia kúdiktiniń marqummen burynnan tanys bolǵanyn habarlady.
13 qańtar kúni júrgizilgen jedel-izdestirý sharalary barysynda quqyq qorǵaý organdary 28 jastaǵy er adamdy ustap, oǵan «Adam óltirý» baby boiynsha aiyp taqty. Sot kúdiktini qamaýǵa alý týraly sheshim shyǵarǵan.
Marqumnyń týǵan aǵasynyń aitýynsha, Nurai kúdiktimen shamamen bir jyl boiy tanys bolǵan. Onyń sózinshe, er adam qyzdy alyp qashýǵa áreket jasap, keiin de ańdyp, qoqan-loqy kórsetken.
Rezonans týdyrǵan oqiǵadan keiin Shymkent qalalyq politsiia departamentiniń basshysy Nurlan Almasbekov qyzmetinen bosatyldy. Sondai-aq onyń birinshi orynbasary men birqatar laýazymdy qyzmetkerler tártiptik jaýapkershilikke tartylyp, qyzmetterinen ketken.
Budan bólek, Nurai Serikbaidyń ólimine bailanysty Qylmystyq kodekstiń 125-1-baby («Neke qiiýǵa májbúrleý») boiynsha taǵy bir qylmystyq is qozǵalǵan.
Qazirgi tańda tergeý aiaqtalýǵa jaqyn. Is maýsym aiynda sot qaraýyna joldanady dep josparlanyp otyr.
