Elordaǵa Birikken Arab Ámirlikteri men Túrkiiadan ushyp kelgen 22 adam COVID-19-ǵa PTR test tapsyrýdan bas tartty, dep habarlaidy "Ult aqparat".
Qalalyq ákimdiktiń málimetinshe, dárigerler birneshe saǵat boiy kelgenderdi QR Bas memlekettik sanitar dárigeriniń qaýlysyn oryndaýǵa kóndirgen.
«22 adam bas tartty, avtobýsta otyrdy jáne kirgisi kelmedi. Biz kóndirýge tyrystyq, olar janjal shyǵaryp baǵynbady. Sebepteri ártúrli boldy. Túnge deiin túsindirgen soń, karantindik statsionarǵa bir-birden kire bastady», - deidi «Ramada Plaza» karantin statsionarynyń direktory Juldyz Danbaeva.
Narazylyq bildirýshilerdiń biri - 42 jastaǵy qala turǵyny. Ol synaq nátijesin kútkisi kelmeitinin aityp, mekemeden ketýge tyrysqan. Politseiler er adamǵa shara qoldandy.
«Er adam áielimen jáne balasymen Túrkiiadan ushyp keldi. Onyń otbasy barlyq protsedýralardan ótse de, ol synama nátijesin kútpeitinin aitty jáne qashyp ketýge tyrysty. Soǵan orai politseiler shara qoldandy», - dep túsindirdi Juldyz Danbaeva.
Dárigerler mundai jaýapsyz azamattar tek jaqyndarynyń ǵana emes, jalpy eldiń densaýlyǵyna qaýip tóndiretinin eskertedi. Sondai-aq, sanitarlyq normalardy saqtamaǵany úshin, maska taqpaǵany úshin tártip buzýshylar ákimshilik jaýapkershilikke tartylady.
«Kóktemde bári osylai bastaldy, eldiń túkpir-túkpirinen kelgender arqyly infektsiia keńinen tarap ketti. Osyndai qarsylyq tanytqandar basqa azamattarǵa, jaqyndaryna, týystaryna qaýip tóndiredi», – deidi dáriger.
Esterińizge sala keteiik, 5 qazannan bastap Qazaqstanda jańa shekteýler engizildi.
Ekinshi sanattaǵy elderden keletin adamdar úshin termometriia, saýalnama júrgizý, úsh táýlikten aspaityn koronavirýs testi týraly anyqtamanyń bolýy siiaqty mindetti talaptar belgilengen.
Anyqtama bolmaǵan jaǵdaida, shetelden kelgender COVID-19-ǵa zerthanalyq tekserý júrgizý úshin statsionarda eki táýlikke deiin oqshaýlanady.
