Búgin túnde Nur-Sultan qalasynyń áýejaiyna shetelden alty ushaq kelip qondy. Áýe reisterin Turkish Airlines, Air Astana, Velavia men Flydubai áýe kompaniialary oryndaǵan, dep habarlaidy "Ult aqparat" áýejaidyń baspasóz qyzmetine silteme jasap.
Astanaǵa ushyp kelgen jolaýshylardyń 101-de PTR-anyqtamasy bolmaǵan, keibirinde anyqtamasynyń ýaqyty ótip ketken. Olar karantindik statsionarǵa jatqyzyldy. PTR-testten ótkennen keiin olar úilerine qaitarylady. Koronavirýs juqtyrǵany belgili bolǵan jaǵdaida infektsiialyq statsionarǵa jatqyzylady.
Eske sala ketsek, 6 qazan kúni saǵat 00.00 kezinde QR Bas memlekettik sanitarlyq dáriger Erlan Qiiasovtyń memlekettik shekaradaǵy ótkizý beketteri arqyly koronavirýs infektsiiasynyń taralýyn aldyn alý sharalaryn kúsheitý týraly qaýlysy shyqqan edi.
Jańa erejelerge sáikes mynadai shekteý sharalary kúshine enedi:
Qazaqstanǵa shetelden áýe reisi arqyly kelgen azamattardyń bári de termometriiadan, anketalaýdan ótip, PTR ádisi arqyly COVID-19 boiynsha testten ótkeni týraly anyqtama (72 saǵatqa jaramdy) kórsetýi tiis;
Qazaqstan azamaty sanalmaityndar adamdar qolynda anyqtama bolmaǵan jaǵdaida elge kirgizilmeidi.
Dene temperatýrasy shekti normada bolǵan jáne anyqtama kórsetken azamatqa COVID-19 belgileri boiynsha túsindirý jumystary júrgizilip, tiisti qolhat berilgennen keiin olar baratyn jerine jiberiledi.
Dene qyzýy bar adamdar qolynda anyqtama bar-joǵyna qaramastan eki aptaǵa karantindik statsionarda oqshaýlanady. Ol jerde atalmysh azamat COVID-19 boiynsha tekserýden ótedi.
COVID-19 boiynsha testten ótkennen keiin koronavirýs juqtyrǵany belgili bolǵan azamattar infektsiialyq statsionarǵa aýystyrylady. Al juqtyrmaǵany anyqtalǵan azamattarǵa túsindirý júrgizilip, tiisti qolhat beriledi.
Ushyp kelgen QR azamattary anyqtama bolmaǵan jaǵdaida eki táýlikke karantindik statsionarǵa jatqyzylady. Ol jerde atalmysh azamat COVID-19 boiynsha tekserýden ótedi.
COVID-19 boiynsha testten ótkennen keiin koronavirýs juqtyrǵany anyqtalmaǵan azamattarǵa túsindirý júrgizilip, tiisti qolhat beriledi.
COVID-19 juqtyryp kelgeni belgili bolǵan azamattar infektsiialyq statsionardyń karantindik oqshaýlaǵyshyna jatqyzylady.
