Endi elordalyqtar qalaǵan emdeý mekemesine eGov elektrondy úkimet portaly arqyly suranys jibere alady. Ol úshin turǵyndarda elektrondyq-tsifrlyq qoltańba (ETsQ) bolýy kerek.
Biylǵy 15 qyrkúiek pen 15 qarasha aralyǵynda bolatyn emhanalarǵa tirkelý naýqanynda eGov arqyly tirkelý múmkindigi qarastyrylǵan. Jańa bastama saladaǵy túrli tártip buzýshylyqtardyń aldyn alýdy maqsat etedi. Iaǵni, aldaǵy ýaqytta tirkelý úshin suranysty qoldan jasaý jaǵdailaryn joiý kózdelip otyr.
Áleýmettik meditsinalyq saqtandyrý qorynyń málimetinshe, emhana nemese dárigerlik ambýlatoriiany erkin tańdaý printsipi tek turǵylyqty jerdiń ákimshilik-aýmaqtyq birligimen shekteledi. Al respýblikalyq jáne oblystyq mańyzy bar qalalarda patsienttiń turatyn aýdany bolyp esepteledi.
«Osy ýaqytqa deiin mundai shekteý bolmady. Biraq jumys protsesinde tirkelý barysyndaǵy erkindik birshama kedergilerge ákeldi. Mysaly, turǵylyqty jerine tirkelmegen adamdarǵa, olardyń qatarynda júkti jáne jańa týǵan nárestelerge qyzmet kórsetý jaǵynan qiyndyqtar týyndady. Osyndai máselelerdiń aldyn alý úshin normativtik bazaǵa ózgerister engizildi. Budan keiin BMSK-ny qaladaǵy bir aýdan aiasynda ǵana tańdaýǵa bolady», - deidi «Áleýmettik meditsinalyq saqtandyrý qory» KEAQ-tyń Nur-Sultan qalasy boiynsha filialy direktory N.Qabdyqaparov.
Jalpy elorda turǵyndary jyl sońyna deiin emhanany birneshe jaǵdaida aýystyra alady. Aldymen azamattyń turǵylyqty mekenjaiy bir aidan astam ýaqytqa ózgerse, sonymen birge emhana qaita ashylǵan jaǵdaida jáne ol qordyń qyzmet jetkizýshileri qatarynan shyǵyp ketse, tirkeýdi aýystyrýǵa múmkindik bar. Sonymen birge arnaiy sebepsiz jylyna bir márte turǵylyqty mekenjaidaǵy emhanany aýystyrýǵa bolady.
Turǵyndar óziniń jańa tańdaǵan emhanasyna tek 2020 jyldyń 1 qańtarynan bastap barady. Al jyl sońyna deiin burynǵy BMSK qyzmet kórsete beredi.
Aita ketsek, densaýlyq saqtaý salasyn tsifrlandyrý boiynsha aqparattyq júielerdi integratsiialaý, mobildi sandyq qosymshalardy paidalaný, elektrondyq densaýlyq tólqujattaryn engizý jáne «qaǵazsyz» aýrýhanalarǵa kóshý arqyly meditsinalyq kómektiń qoljetimdiligi men tiimdiligin arttyrý máseleleri jolǵa qoiyldy.
