Elordada SQO men Pavlodar oblysy óndirýshileri taýarlarynyń jármeńkesi ótýde. Qyrkúiek aiynyń basynan bastap jármeńkelerge elimizdiń barlyq óńirleri qatysty. Bul týraly Nur-Sultan qalasynyń ákimi Altai Kólginov óz Instagram paraqshasynda jazdy, dep habarlaidy ákimdiktiń resmi saity.
«Demalys kúnderi elordada ótip jatqan óńirlerdiń aýyl sharýashylyǵy jármeńkesi osy aptada qorytyndylanady. Qyrkúiek aiynyń basynan bastap jármeńkege elimizdiń barlyq oblystary qatysty. Búgin jáne erteń Pavlodar jáne Soltústik Qazaqstan oblystary óz ónimderin usynady.
Aýyl sharýashylyǵy jármeńkeleri kezinde Nur-Sultanǵa 4 myń 300 tonnadan astam ónim ákeldi. Mundai jármeńkelerdi ótkizý áleýmettik mańyzy bar taýarlardyń baǵasyn bir qalypta ustaýǵa múmkindik beredi. Ónimder naryqtyq baǵadan 15-20%-ke tómen. Barlyq jetkizilgen taýarlar sertifikattalǵan jáne veterinarlyq baqylaýdan ótken. Epidemiialogiialyq jaǵdaidy eskere otyryp, barlyq sanitariia normalary saqtaldy.
Aýyl sharýashylyǵy jármeńkelerine qatysqany úshin ákimderge men óńirlerdegi aýyl sharýashylyǵy taýarlaryn óndirýshilerge alǵys aitamyn!
Sonymen qatar, áleýmettik mańyzy bar azyq-túlik taýarlarynyń baǵasyn ustap turý úshin birqatar sharalar qabyldandy: «ainalym tetigi» jobasyn jalǵastyrdyq. Saýda jelilerine azyq – túlik satyp alýǵa bólinetin soma 13 eseden astam - 180 mln teńgeden 2,4 mlrd teńgege deiin ulǵaidy. Bul áleýmettik mańyzy bar ónimderdiń 16 túriniń baǵasyn ustap turýǵa múmkindik beredi.
Sondai-aq, eger buryn jobaǵa saýda jelisiniń 4 nysany qatyssa, qazir 12-Magným, Astyqjan, Kenmart, Vkýsmart, A2, Metro, Anvar, Rahmet, Aqmol, Smoll, Artem, Shapaǵat. Sonymen qatar, turaqtandyrý qory quryldy», - dep jazdy Altai Kólginov.
