Nur-Sultandaǵy iri kólik apatynda avtobýs júrgizýshisi erlik jasady, dep habarlaidy Sputnik agenttigi "Astana LRT"-ǵa silteme jasap.
"Baqdáýlet Álibek zardap shekkenderge alǵashqylardyń biri bolyp kómektesti. Ol apat bolǵan ýaqytta óziniń avtobýsymen qarsy baǵytqa bara jatqan. Jantúrshigerlik oqiǵany kórgen júrgizýshi avtobýsyn toqtatyp, zardap shekkenderge kómekke bardy. Úsh jolaýshymen birge qiraǵan avtobýs esigin ashýdyń jolyn tapqan. Zardap shegýshilerdiń jaraqaty ártúrli boldy", - deidi kólik kompaniiasynyń ókilderi.
Baqdáýlettiń aitýynsha, ol qaýipsizdik tehnikasyn saqtaýǵa erekshe kóńil bólgen. Sondyqtan mundai iri apat kezinde múldem saspaǵan. Kompaniia júrgizýshige tótenshe jaǵdaida belsendi bolyp, jolaýshylarǵa kómekteskeni úshin alǵys bildirdi.
"Astana LRT" AQ baspasóz hatshysy Naýat Azanbaevtyń aitýynsha, júrgizýshi bul erligin bárinen jasyryp kelgen.
Eske sala ketsek, 26 naýryzda Nur-Sultan qalasyndaǵy Uly Dala kóshesi men Qabanbai batyr dańǵyly qiylysynda jantúrshigerlik jol apaty boldy. Úsh avtobýs soqtyǵysyp, birneshe avtokólikke, sonyń ishinde jedel járdem kóligine de zaqym keldi. Apat saldarynan 1966 jyly týǵan avtobýs júrgizýshisi men 26 jastaǵy jolaýshy kóz jumdy.
