Nur-Sultanda keshki júgirýge shyqqan áieldi zorlamaq bolǵan er adam ustaldy. Elordalyq politseiler kúdiktini izin sýytpai qolǵa túsirdi. Bul týraly qalalyq Politsiia departamenti habarlady.
Saǵat 19:34-te «102» arnasyna jas jigittiń áieldi zorlaýǵa tyrysqany jáne onyń belgisiz baǵytqa qashyp ketkeni týraly habarlama túsken.
Mán-jaidy tekserý barysynda 42 jastaǵy áieldiń B.Momyshuly kóshesiniń boiymen júgirýge shyqqany jáne onyń sońynan ergen kúdikti er adamdy baiqaǵany anyqtaldy. Jábirlenýshiniń aitýynsha, onyń qolynda eki paket bolǵan. Keiin belgili bolǵandai, kúdikti óz oiyn iske asyrǵasyn kiimin aýystyryp, jasyrynýdy oilaǵan.
Qaskúnem alkogoldi ishimdikke mas kúiinde áieldi qýyp jetken jáne ony jerge qulatyp, dóreki kúsh qoldanǵan. Kóshedegi kezdeisoq jolaýshylar áieldiń aiqaiyn estip, kómekke kelgen. Olardy kórgen qylmysker qashyp úlgergen.
«102» arnasyna aqparat kelip túsken soń, qaskúnemdi ustaýǵa politsiia departamentiniń jeke quramy jiberildi jáne kúdikti izin sýytpai ustaldy. Ol turaqty jumysy joq, 20 jastaǵy jigit bolyp shyqty. Áiel ony tanydy.
Atalǵan fakti boiynsha qylmystyq is qozǵalyp, tergeý amaldary júrgizilýde. Kúdikti ýaqytsha ustaý izoliatoryna qamaldy.
