Profilaktikalyq sharalar júrgizý kezinde politseiler túngi ekiler shamasynda Taraz kóshesinen 27 jastaǵy jigitti ustady. Odan sholaq ańshy myltyǵy tárkilendi, dep habarlaidy "Ult aqparat" Nur-Sultan qalasy politsiia departamentiniń baspasóz qyzmetine silteme jasap.
Jas jigittiń aitýynsha, ol myltyqty beitanys adamnan satyp alyp, keleshekte bótelkelerdi atyp jattyqpaqshy bolǵan. Oǵan qosa, myltyqty óz erkimen tapsyrmaq ta bolǵan, alaida ol qarýdy tapsyrǵanǵa deiin politsiiaǵ ustalǵan.
Mamannyń qorytyndysyna sáikes, alynǵan qarý – mehanikalyq tásilmen qysqartylǵan, tehnikalyq jaǵynan atýǵa jaramdy, bir uńǵyly zaýyttan shyqqan myltyq.
Atalǵan fakti boiynsha ustalǵan azamatqa qatysty qarý men oq-dárilerdi zańsyz saqtaǵany, tasymaldaǵany, alyp júrgeni úshin qylmystyq is qozǵaldy.
Elorda aýmaǵynda atys qarýyn qoldanýmen qylmystardyń aldyn alý jáne jolyn kesý jáne azamattyq, qyzmettik qarý ainalymyna memlekettik baqylaýdy júzege asyrý maqsatynda 17 mamyrdan 16 maýsymǵa deiin «Qarý» jedel-aldyn alý is-sharasy ótkizildi.
Is-shara qorytyndysy boiynsha ainalymnan barlyǵy 32 zańsyz saqtalǵan qarý men 71 oiyqty qarýdyń oǵy alyndy. Qarý ainalymy erejesin buzǵany úshin tirkelgen qarýdyń 337 birligi tárkilendi.
Is-shara bastalǵannan beri 15 myń qarý iesi tekserildi, 104 saqtaý jáne alyp júrý faktisi, 113 qarýdy qaita tirkeý tártibin buzý faktisi anyqtaldy. Barlyq tártip buzýshylar ákimshilik jaýapqa tartyldy.
