Elorda politseileri oiynshyq tapanshamen lombard tonaǵan kúdiktini ustady, dep habarlaidy "Ult aqparat" qalalyq politsiia departamentiniń baspasóz qyzmetine silteme jasap.
Oqiǵa keshe bolǵan. «102» pýltine astana lombardtarynyń birinen kassir habarlasyp, belgisiz er adam tapansha kezenip, 200 myń teńgeni tonap ketkeni týraly aitqan.
Kassirdiń bergen málimeti boiynsha, kúndizgi saǵat 12.00-de meditsinalyq maska kigen er adam terezeden tapansha kezenip, tsellofan dorbaǵa kassadaǵy aqshanyń bárin salýdy sybyrlap buiyrǵan. Buiryq oryndalmasa, tapanshamen atyp tastaitynyn aityp, qorqytqan. Kassir aitqanyn oryndap, kassadaǵy bar aqshany tonaýshy usynǵan dorbaǵa salyp bergen.
«Oqiǵa ornyna jedel politsiia jasaǵy kelip, kúdiktiniń belgilerin anyqtady. Jedel basqarý ortalyǵynyń operatorlary beinekameralardy súzgiden ótkizip, kúdiktige uqsas er adamnyń izine tústi. Kadrdan onyń asyǵys júrip bara jatyp, belgisiz zatty baiqatpai laqtyrǵany aiqyn kórinedi. Ol tastaǵan belgisiz zat – oiynshyq tapanshany basqa bir júrginshi taýyp alǵan. Kúdikti saýda úiiniń turaǵynda ustaldy. Ol qala mańyndaǵy kenttiń 28 jastaǵy turǵyny bolyp shyqty», - dep habarlaidy politsiia departamentiniń baspasóz qyzmeti.
Kúdikti óz kinásin moiyndady. Qazir ýaqytsha ustaý izoliatoryna qamaýda otyr. Atalǵan oqiǵa izimen «qaraqshylyq» baby boiynsha qylmystyq is qozǵaldy.
