Biyl elordada memlekettik qoldaý aiasynda 100-ge jýyq kásipkerlik jobaǵa sýbsidiia berildi. Bul týraly «Damý» qorynyń Nur-Sultan qalasy boiynsha aimaqtyq filialynyń direktory Nursultan Abdolla málim etti, dep habarlaidy QazAqparat.
«Nur-Sultan qalasynda memlekettik qoldaý aiasynda bizdiń qor arqyly ótken jyly 200-dei joba júzege asty. Biylǵy 6 aida elordada 90 joba memlekettik qoldaýǵa ie bolyp, onyń iske asýyna kepildik berildi. Odan bólek, biyl 6 aidyń ishinde 100-ge jýyq joba sýbsidiialandy. Onyń ishinde shaǵyn, orta jáne iri kásipkerlik bar», - deidi N. Abdýlla.
Onyń aitýynsha, memlekettik qoldaýda basymdyq - óndirý jáne qaita óńdeý salalaryna beriledi.
«Bizdiń qor árbir jańadan ashylǵan ónerkásipke esep júrgizedi. Ondaǵy maqsat – memlekettik qoldaý arqyly berilgen qarajattyń durys jumsalýyn qadaǵalaý. Eger memleket tarapynan berilgen qarajat maqsatsyz jumsalsa, onda ol sýbsidiia keri qaitarylýy tiis. Memlekettik qoldaýdyń aiasynda óz izin ashqan kásipkerdi biz jarty jyldan soń ǵana tekserýge quqyǵymyz bar. Árine, barlyǵy kelisimshartqa sáikes, iaǵni zań aiasynda sheshiledi. Karantin rejimine bailanysty búginde astanalyq kásipkerlerdi mazalaityn másele - tólemaqy jáne ony óteý ýaqytyn uzartý. Sonymen qatar, kásipkerler óz isin odan ári jandandyrý maqsatynda qosymsha sýbsidiia surap otyr», - deidi ol.
