Nur-Sultan qalasynyń qyzyl aimaqqa engenin eskere otyryp, jeksenbi kúni, iaǵni 21 naýryzda elordaǵa lokdaýn engiziledi, dep habarlaidy "Ult aqparat" elorda ákimdiginiń resmi saityna silteme jasap.
Jeksenbide saýda, oiyn-saýyq ortalyqtary, saýda úileri, saýda ortalyqtary (olarda ornalasqan dárihanalardy, sondai-aq tamaq ónimderi men birinshi kezekte qajetti zattardy satatyn jáne ornalasqan jerine qaramastan qyzmetine ruqsat etilgen obektilerdi qospaǵanda), jabyq azyq-túlik emes bazarlar, azyq-túlik emes taýarlardy ótkizetin obektiler, jabyq sport obektileri, HQO, «Qazposhta» AQ sekildi mekemelerdiń jumys isteýine tyiym salynady.
Sondai-aq, dezinfektsiialyq jumystar júrgizilýine bailanysty jeksenbi kúni qoǵamdyq kóliktiń jumysy toqtatylady.
Senbi jáne jeksenbi kúnderi fitnes-ortalyqtardyń, fitnes-klýbtardyń, sporttyq-saýyqtyrý obektileriniń, saýnalardyń, SPA-ortalyqtardyń («sary aimaq» kriteriileri qoldanylatyn «Ashyq» pilottyq jobasyna qatysatyn obektilerdi qospaǵanda) jumysyna tyiym salynady.
«Qaladaǵy epidemiologiialyq jaǵdai turaqsyz. Ótken mereke kúnderinen keiin koronavirýs infektsiiasyn juqtyrýshylar sany kúrt kóbeidi. Osyǵan bailanysty qosymsha karantin shekteýleri bar qaýly 18 naýryzdan bastap qoldanysqa engiziledi.
Naýryz meiramyna orai buqaralyq is-sharalar ótkizýge tyiym salynady. Indettiń órshýine jol bermeý kerek. Meditsinalyq uiymdar men meditsina qyzmetkerlerine shamadan tys júkteme bolmas úshin qatań sanitarlyq normalar saqtalýy qajet, iaǵni betperde taǵyp, áleýmettik qashyqtyqty saqtaý kerek», - dedi Nur-Sultan qalasynyń bas memlekettik sanitarlyq dárigeri Sarhat Beisenova.
S. Beisenova 18 naýryzdan bastap qoǵamdyq tamaqtaný obektileriniń (meiramhanalar, dámhanalar, barlar, ashanalar) jumys jáne demalys kúnderi saǵat 07:00-den 22:00-ge deiin jumys ýaqyty qysqaratynyn atap ótti.
Sonymen qatar, 18 naýryzdan bastap kinoteatrlar men kinorýmdardyń jumysyna tyiym salynady.
