2 qyrkúiek kúni Nur-Sultan qalasynyń politsiia bólimine Saraishyq kóshesinde ornalasqan kópirde boijetkenniń sýǵa sekireiin dep turǵany týraly habarlama kelip túsken, dep habarlaidy "Ult aqparat".
Jedel basqarý ortalyǵynyń operatorlary kámelet jasyna jetpegen qyz balanyń ornalasqan jerin shuǵyl anyqtady. Bes minýttyń ishinde oqiǵa ornyna politsiia departamenti patrýl politsiia polkiniń qyzmetkerleri – Qaiyrbekov Baýyrjan, Alpysbaev Erjan, Qasenov Mádi jáne Amantai Ádiletten quralǵan eki ekipaj kelip jetti.
Kópir taianyshynda otyryp, tómenge sekirmek bolǵan qyzdy kórgen tártip saqshylary ony áńgimege tartýǵa tyrysty. Kapitan Baýyrjan Qaiyrbekovtiń aitýynsha, qyz bala olardyń sózin elemei, kúizelis jaǵdaiynda bolǵan. Ol qasyna eshkimniń jaqyndamaýyn ótinip, aiqailady.
Politsiia qyzmetkeri Amantai Ádilet boijetkenniń qarsylasqanyna qaramastan ony qushaqtap alyp, áriptesterimen birge qaýipsiz jerge shyǵaryp aldy.
Ózine qol jumsamaq bolǵan 16 jasar qyz bala ata-anasymen birge Esil aýdanynyń politsiia basqarmasyna jetkizildi. Qazirgi kezde jasóspirimmen psiholog mamandar áńgimelesýde.
Elordalyq politsiia departamentiniń basshylyǵy qyzmet kezinde jedel áreket etken tártip saqshylaryn marapattaidy.
