Elordalyq kópbalaly analar úkimet aldyna mitingige shyqty, dep habarlaidy Sputnik Qazaqstan.
Olardyń basty talaby - baspana. Mitingige jinalǵandar tizim jasap, ákimdikke tapsyrdy. Tizimde 59 adamnyń aty-jóni jazylǵan.
"Biz úi talap etip jatyrmyz. Qazir baspana kezeginde turǵan adamdar kóp. Nege memleket ondai jaǵdaiǵa jetkizip otyr? Qazaqstannyń bailyǵymen baspana kezegi múldem bolmaýy kerek. Biz arendalyq páterge ilige almai otyrmyz. 2 protsenttik ipoteka alaiyn desek, "sozaemshik" suraidy. Ony alý úshin jalaqynyń kólemi 42 500 teńge bolýy kerek. Sodan sál asyp ketse, bermeidi , - deidi kópbalaly ana Firýza Abyzova.
Nur-Sultan ákiminiń orynbasary Baqtiiar Máken analardyń bárin jeke-jeke qabyldaimyn dep ákimdikke shaqyrdy.
"Myna jerde bir ǵana másele kóterilip otyr. Ol - baspana. Al baspana máselesin sheshý úshin biz osy jerge jinalǵan árbir adamdy jeke-jeke qarap, qujattaryn tekserýimiz kerek. Bárimiz avtobýsqa otyraiyq, ákimdikke baraiyq. Men bárin jeke-jeke qabyldaimyn", - dedi ol.
Biraq kópbalaly analar ákimdikke barýǵa kelispedi. "Baspana" dep urandatyp, úkimet aldynda tura berdi.
"Biz árbir ananyń muń-muqtajyn túsinip otyrmyz. Kópbalaly otbasy ekenin de bilemiz. Biraq qazir úidi bere salý degen joq. Bizde úi kezeginde kóp adamdar tur. Olardy da umytpaýymyz qajet", - dep Baqtiiar Máken áielderdi tynyshtandyrýǵa tyrysty.
Eńbek jáne halyqty áleýmettik qorǵaý vitse-ministri Svetlana Jaqypova kópbalaly analardyń talap-tilekterin rastady.
"Qazir qoiyp otyrǵan negizgi talaptary ol - úi berý. Endi ákimdik dál qazir bárine úi taratyp beredi dep aita almaimyn. Negizi, baspanaǵa muqtaj adamdardyń bir bóligine arendalyq páterler beriledi. Áielderdiń taǵy bir toby bastapqy jarnamyz bar deidi. Kredit berýdi suraidy", - dedi Jaqypov.
Aita ketsek, búginde Nur-Sultanda 46 myń adam turǵyn úi kezeginde tur. Onyń 3 myńnan astamy kópbalaly otbasy eken. Biyl kópbalaly analar, turmysy tómen azamattar, múmkindigi shekteýli jandarǵa shamamen 2 myń páter berý josparlanǵan.
