Sanitariia normalaryn saqtamaǵan kafeler men meiramhanalardyń ielerine kóp mólsherde aiyppul salynady, dep habarlaidy "Ult aqparat" elorda ákimdiginiń resmi saityna silteme jasap.
Politseiler men Nur-Sultan qalasy ákimdiginiń mobildi toby karantin tártibin buzýshylardy anyqtaý boiynsha kezekti reid júrgizdi. Birqatar mekemelerde sanitariia erejeleri saqtalmaityny anyqtaldy.
Solardyń biri – Turan dańǵyly, 2 meken-jaiynda ornalasqan «Aýra» kafesi. «Jazǵy terrassada qoiylǵan 15 ústeldiń barlyǵynda kelýshiler boldy. Olardyń arasynda qashyqtyq saqtalmaǵan. Kafe ishindegi karaokeniń eki kabinasynda da adamdar boldy. Maska taǵý tártibi saqtalmaǵan. Jarlyqqa sáikes jumys ýaqyty 22:00-ge deiin bolsa da, kafe saǵat 23:00-de áli jumys jasap tur», – deidi Nur-Sultan ákimdiginiń azamattyq qorǵanysty qamtamasyz etý ortalyǵynyń bas mamany Jeńis Kamaliev.
Mekeme ielerinen jazbasha túsinikteme alyndy. «Atalǵan fakti boiynsha jergilikti politsiia qyzmetkerleri aýdandyq SES basqarmasyna habarlama jiberdi.
«Halyqtyń sanitarlyq-epidemiologiialyq salaýattylyǵy salasyndaǵy zańnama talaptaryn, sondai-aq gigienalyq normativterdi buzý» baby boiynsha tiisti sharalar qabyldanady», – dedi mobildi toptardyń úilestirýshisi Aman Ospanov.
Baptyń sanktsiialary úlken aiyppul salýdy qarastyrady. Jaýapty tulǵalar biznes ieleri men kelýshilerdi barlyq qoǵamdyq oryndarda sanitariia normalaryn qatań saqtaýǵa shaqyrady: sanitaizerlerdi qoldanyp, maska taǵý, qashyqtyq saqtaý kerek.
Aita keteiik, ótken aptada Nur-Sultanda politsiia qyzmetkerleri, epidemiologtar, eriktiler, jergilikti atqarýshy organdardyń ókilderinen turatyn mobildi toptar 227 karantin tártibin buzýshylyqty anyqtady. Onyń ishinde maska taǵý jáne áleýmettik qashyqtyq saqtaýdyń mindetti talaptaryn buzý – 146 bolsa, tyiym salynǵan ýaqytta qyzmetin júzege asyrǵan 81 kásipkerlik sýbekti karantin talaptaryn buzǵan.
