Elordada monitoringtik toptar kúsheitilgen jumys rejimine kóshirildi. Karantindik shekteýlerdiń buzylýyn anyqtaý jáne boldyrmaý úshin reidter elordanyń barlyq aýdanynda ótkiziledi, dep habarlaidy "Ult aqparat" qala ákimdiginiń resmi saityna silteme jasap.
13 naýryzǵa qaraǵan túni monitoring toby «BHB» barynda jumys rejiminiń buzylýyn anyqtady. Tún ortasynan keiin mekemede 400-ge jýyq adam bolǵan.
Oqiǵa ornyna saǵat 00.19-da kelgen monitoringtik top «BHB» barynyń jumys rejimi týraly elordanyń sanitarlyq dárigeriniń qaýlysynyń talaptaryn buzyp, jumysyn jalǵastyryp jatqanyn anyqtady. Sonymen qatar, mekemede bir ýaqytta áleýmettik qashyqtyq pen maska rejimin saqtamaǵan 400-ge jýyq kelýshi boldy. Jinalǵan material kásipkerlik sýbektisin jaýapkershilikke tartý úshin tiisti organdarǵa berildi.
Aita keteiik, 2021 jyldyń 1 qańtarynan bastap elordanyń sanitarlyq-epidemiologiialyq baqylaý basqarmasyna 287 shuǵyl habarlama kelip tústi. Olardyń negizinde kásipkerlik sýbektilerine karantindik shekteýlerdi buzý isine qatysty jospardan tys 280 tekserý júrgizildi.
Olardyń qorytyndysy boiynsha 60,5 mln teńgeden astam somaǵa 261 jeke jáne zańdy tulǵa ákimshilik jaýapkershilikke tartyldy.
Sanitarlyq-epidemiologiialyq tekserý qyzmetkerleri mamandandyrylǵan aýdanaralyq ákimshilik sotqa buzýshylyqtardy joiý týraly nusqamany oryndamaityn 47 «qasaqana buzýshyǵa» qatysty 54 material jiberdi.
Sot obektilerdiń qyzmetin toqtatý týraly 28 jeke jáne zańdy tulǵaǵa qatysty ákimshilik sharalar qabyldady.
Búgingi tańda 13 kásipkerlik nysanynyń qyzmeti toqtatyldy. Olar: «Teukila» karaoke-bar, «ZOLOTO» meiramhanasy, «Stories» (qazirgi ýaqytta «Dva grýzina») laýndj-bary, «Abba» laýndj-bary, «Alaniia» túngi klýby, «Echo» laýndj-bary, «Janym sol» karaoke-bary, «Echo» laýndj-bary, «Kango» batýt ortalyǵy, «Ginza» restoran-karaoke, «Alanya» restoran-karaoke, «Nirvana» bar, «Loto-klýb».
Alaida QR zańnamasynyń talaptaryn qasaqana elemeý jáne kásipkerlik sýbektileri nysandarynyń qyzmetin jáne jumys rejimin toqtatý týraly sot jáne sot oryndaýshylarynyń qaýlylaryn oryndamaý faktileri bar ekenin atap ótken jón.
Osylaisha «Alaniia» túngi klýby sot oryndaýshysynyń kirý esikterin mórlep, sýmen jabdyqtaýdy óshirgenine qaramastan, 2021 jylǵy 7 naýryzda sýmen jabdyqtaýǵa jekelei qosylyp, jumysyn jalǵastyrdy.
Monitoringtik top «Tekuila» karaoke-bary sot qaýlysyn buzdy dep aiyptady. Mekeme ieleri sot oryndaýshysy salǵan plombalardy úsh ret jyrtyp, sýmen jabdyqtaýdy derbes qosqan.
«Echo» laýndj-bary da plombany julyp alyp, jumysyn jalǵastyrdy. Zań buzý faktisi 2021 jyldyń 6 naýryzynda anyqtaldy.
Óz kezeginde «Nirvana» bary da plombanyń buzylýyna jáne jumystyń zańsyz qaita jandanǵanyna bailanysty aiyptaldy.
Kásipkerlik sýbektileri tarapynan oryn alǵan qasaqana buzýshylyq faktileri týraly hattar QR zańnamasyn buzýshylardy jaýapkershilikke tartý boiynsha pármendi sharalar qabyldaý úshin Ádilet departamentine, qalalyq prokýratýraǵa joldandy.
2021 jylǵy 10 naýryzda sot qaýlylarynyń oryndalmaýyna bailanysty aǵa sot oryndaýshysy «Tekuila» kafe-bary men «Alanya» karaoke-meiramhanasyn sýmen jabdyqtaýdan jáne elektr qýatynan ajyratýdy júrgizdi.
Esterińizge sala keteiik, 10 naýryzdan bastap Nur-Sultan qalasy epidemiologiialyq jaǵdai boiynsha «qyzyl aimaqqa» endi. Karantindik shekteýlerdi buzýshylyqtardy anyqtaý jáne boldyrmaý boiynsha monitoringtik toptardyń jumysy kúsheitilgen rejimge aýystyryldy.
