20 sáýirde elordadaǵy iri qurylys dúkenderi jumysyn bastady. Nur-Sultan turǵyndary tótenshe jaǵdaidaǵy karantin rejiminde qurylys-árleý materialdary gipermarketteriniń birinde taýar alý úshin kezekte tur, dep habarlaidy QazAqparat.
«Gipermarkettiń jumys rejimi tańǵy 9:00-den keshki 18:00-ge deiin. Shtattyń 50%-y qaladan tys jerde turatyndyqtan, 30%-yn ǵana jumysqa shyǵardyq. Qalǵandary da jumysqa shyqqysy keledi. Sanitarlyq-epidemiologiialyq talaptardyń algoritmi boiynsha satyp alýshylar úshin eki metr qashyqtyqty ustap júrý úshin belgiler qoidyq. Esik aýzynda baqylaýshy kelgen adamdardyń qolyna sanitaizer búrkip turady. Dene qyzýyn ólshep turatyn baqylaýshy da bar. Dene qyzýy kóterilip turǵan satyp alýshy bolǵan joq, biraq meditsinalyq maska taqpai kelgender boldy. Biz olardy saýda jasaityn jerge jibermni, aldymen maska taǵyp kelýin ótindik», - deidi «Megastroi» gipermarketi direktorynyń orynbasary Oksana Sýhorýkova.
Ol qurylys materialdaryna suranys kóp ekenin aitty.
«Bizde az adam jumys istep jatqandyqtan, osynshama tutynýshy keledi dep oilamadyq. Búgin qosymsha qyzmetshiler aldyq. Qurylys materialdaryn salatyn arba ár qoldanystan keiin dezinfektsiialanady. Saýda jasaityn orynda satyp alýshylar ara qashyqtyq saqtaýlary kerek ekendigi daýys zoraitqyshpen aitylady. Gipermarketke bes adamnan kirgizemiz, kassaǵa únemi qarap otyramyz», - deidi ol.
Sondai-aq, ol gipermarket jumysshylary 42 500 teńge áleýmettik tólem alǵan-almaǵany týraly aitty.
«Personaldarmen jumys bóliminiń basshysy Jumyspen qamtý ortalyǵyna 42 500 teńge kóleminde áleýmettik tólem alýǵa ótinish berdi. Bizdiń qyzmetshilerdiń 80%-y atalǵan járdemaqyny aldy. Kei qyzmetshilerge ártúrli sebeppen tólem berilmeitini týraly habarlama keldi, qalǵany áli de kútýde. Jalpy alǵanda qyzmetshilerdi úiine ózimiz tasymaldaimyz, tamaǵy bar. Biz dene qyzýy nemese JRVI belgileri bar-joǵyn tekseretin meditsinalyq qyzmetshini jumysqa aldyq», - deidi direktordyń orynbasary.
Sonymen qatar, taýarlar men qyzmetterdiń sapasy men qaýipsizdigin baqylaý bólimi erejelerdi saqtaýǵa shaqyryp, karantin kezindegi qurylys dúkenderiniń jumys algoritmi týraly aitty.
«20 sáýirden bastap iri qurylys dúkenderiniń jumysy qaita jandandy. Olardyń qyzmetine sanitarlyq-epidemiologiialyq talaptarǵa sáikes belgili bir jaǵdailarda ruqsat etilgen. Jalpy aýdany 2 myń sharshy metrden asatyn qurylys dúkenderiniń jumys kestesi saǵat 9: 00-den 18:00-ge deiin jalǵasady», - deidi Nur-Sultan qalasy taýarlar men qyzmetterdiń sapasy men qaýipsizdigin baqylaý bóliminiń bastyǵy Ainur Dáýletbaeva.
Ol keńes berýshi men satyp alýshynyń araqashyqtyǵy 2 metr bolýy qanshalyqty mańyzdy ekenin aityp ótti jáne halyqty karta arqyly tólem jasaýǵa shaqyrdy.
«Ǵimarat ishinde dezinfektsiia júrgizilip turýy kerek. Qyzmetshilerdiń tamaqtanýyn durys uiymdastyrý kerek. Tamaqtandyrýdy uiymdastyrý keste boiynsha júzege asýy kerek, qyzmetshiler bir jerde jinalyp qalmai, ózderin 2 metr qashyqtyqta ustaýy kerek», - deidi ol.
