Nur-Sultan qalasynda «Ashyq» ilki jobasyna 39 kásipkerlik nysany qatysýda. Bul týraly Nur-Sultan qalasynyń bas memlekettik sanitarlyq dárigeri Sarhat Beisenova aityp berdi, dep habarlaidy QazAqparat.
«Koronavirýs infektsiiasynyń taralýynyń aldyn alý jáne shekteý sharalaryn engizý kezeńinde kásipkerlik nysandaryn qoldaý maqsatynda Nur-Sultan qalasynda «Ashyq» pilottyq jobasyn iske asyrý bastaldy. Joba fitnes-klýbtarda, spa-ortalyqtarda, saýnalar men basseinderde, kompiýterlik klýbtarda jáne boýling klýbtarda júzege asyrylady. Búgingi tańda Nur-Sultan qalasynda pilottyq jobaǵa 39 kásipkerlik nysany qatysýda», - S. Beisenova elorda ákimdiginde ótken onlain brifingte.
Spikerdiń aitýynsha, qosymsha qaýipsizdik sharalaryn qamtamasyz etedi.
«Monitoringtik toptardyń qyzmetkerleri birneshe ret ózin-ózi oqshaýlaý jáne úi karantini rejimin buzý faktilerine tap boldy. Naýqas nemese olarmen qatynasta bolǵan adamdar sanitarlyq dáriger nusqaýlaryn buzyp, qoǵamdyq oryndarǵa barady, osylaisha virýstyń taralý qaýpin týdyrady. Bul joba «Ashyq» pilottyq jobasyna qatysatyn nysandarǵa kirgende kelýshiniń COVID mártebesin bilýge múmkindik beredi jáne tek úide ózin-ózi oqshaýlaý rejimin buzatyn adamdardy anyqtaýǵa baǵyttalǵan», - dep túsindirdi S. Beisenova.
«Ashyq» mobildi qosymshasyn App Store jáne Play Market arqyly júkteýge bolady. Nysannyń QR-kodyn skanerlep, sodan keiin JSN engizý kerek. QR-kodtardy paidalaný jáne koronavirýsqa arnalǵan testterdiń jalpy bazasymen integratsiialaý arqyly pilottyq joba nysan kelýshisiniń mártebesin anyqtaidy.
«Jasyl» mártebe kelýshiniń derekter bazasynda COVID-19 teris nátijesimen PTR-testileýden ótkenin bildiredi. «Kók» mártebe – PTR-testileý nátijesi joq, COVID-19 naýqasymen bailanyspaǵan. «Sary» tús – derekter bazasynda COVID-19 naýqaspen bailanysta bolǵanyn bildirse, «qyzyl» tús –COVID-19 boiynsha bazada oń nátijemen tirkelgenin kórsetedi. Kelýshide smartfon bolmaǵan jaǵdaida, kásipkerlik nysannyń qyzmetkeri kelýshiniń mártebesin óz kelisimimen aqparattyq júiede tekseredi», - deidi S. Beisenova.
Aita keteiik, elordada COVID-19 aýrýy qańtar aiymen salystyrǵanda 33,8%-ǵa tómendedi. Táýligine shamamen 68 infektsiia juqtyrý jaǵdaiy tirkeledi, onyń ishinde 37 jaǵdai simptomdy, 31-i simptomsyz túrde.
Qalada kóbinese 30-39 jastaǵy adamdar basym aýyrady, olar 24,8% quraidy. 50 jastan asqan adamdar – 23,5 % bolsa, balalardyń jalpy syrqattanýshylyqtaǵy úlesi – 14,9% quraidy.
