Nur-Sultan qalasynyń ákimi Altai Kólginov elordanyń týristik áleýmeti týraly baiandady, dep habarlaidy QazAqparat.
«Qaladaǵy týrizm salasy óte qarqyndy damyp keledi. Sońǵy 10 jylda týrister men qonaq úiler sany eselep artty. Nur-Sultan qalasyndaǵy jańa áýejai terminalynyń ashylýy jolaýshylar aǵynyn 3,5 esege kóbeitýge múmkindik berdi. Bizdiń áýejai jylyna 8 mln týristi qabyldai alady», - dedi ákim PATA Travel Mart 2019 Aziia-Tynyq muhity elderiniń halyqaralyq týristik kórmesinde.
Onyń aitýynsha, biyl elorda Mastercard kompaniiasynyń úzdik 200 týristik baǵyty reitingine endi.
«Niý-Iork, Los-Andjeles, Kýala-Lýmpýr syndy jahandyq qalalardyń tájiribesin zerttep, Nur-Sultan - NS týristik brendi jasaldy. Prezidenttiń tapsyrmasymen biyl astanada Halyqaralyq týrizm men qonaqjailylyq ýniversiteti ashylady», - dedi A. Kólginov.
Odan bólek, elordanyń týrizmin damytýdyń úsh negizgi baǵyty anyqtalǵan.
«Birinshi baǵyt - oqiǵalyq, is-sharalar týrizmin damytý, álem chempionattaryn kóptep uiymdastyrý. Mysaly, qazir Nur-Sultanda kúresten álem chempionaty ótip jatyr. Maýsym aiynda Ortalyq Aziianyń Comic Con festivali ótti, oǵan 53 myń adam keldi. Shilde aiynda dástúrli Ironman ótkizdik. Ekinshi baǵyt - meditsinalyq týrizm. Halyqaralyq sarapshylar Nur-Sultanda meditsinalyq týrizmniń úlken áleýetin kórip otyr. JSI akkredittegen jeti uiymnyń altaýy bizdiń astanamyzda ornalasqan. Úshinshiden, Nur-Sultan - Eýraziiadaǵy úzdik kórme ortalyǵy. Biz Halyqaralyq kongresster men konferentsiialar qaýymdastyǵynyń Eýraziiadaǵy eń iri múshesimiz. Halyqaralyq deńgeidegi sharalar sheteldik qonaqtardy kóbeitip qana qoimai, qala ekonomikasynyń damýyna yqpal etedi», - dedi A. Kólginov.
Eske sala ketsek, TMD aýmaǵynda alǵash ret Nur-Sultanda PATA Travel Mart 2019 Aziia-Tynyq muhity elderiniń halyqaralyq týristik kórmesi ashyldy. Oǵan Aziia-Tynyq muhity aimaǵy elderiniń 250-den astam týristik kompaniiasy qatysýda. Kórme aiasynda Tax Free Qazaqstannyń týristerge salyqsyz júiesi iske qosylady.
