Qostanai-Nur-Sultan jáne Qostanai-Troitsk (RF shekarasy) avtojoldarynda aqyly júies engizý máselesine qatysty qoǵamdyq tyńdaý ótti. Bul jaiynda «QazAvtoJol» UK» AQ baspasóz qyzmetinen málim etti, dep habarlaidy "Ult aqparat".
Qostanai oblysynyń ortalyǵynda, sondai-aq Áýliekól, Fedorov, Qarabalyq, Qarasý jáne Qostanai aýdandarynda ótken qoǵamdyq tyńdaý barysynda «Qazavtojol» ulttyq kompaniiasynyń ókilderi atalǵan joldar 2-tehnikalyq sanatqa jatatynyn, sondyqtan jeńil avtomobilderdiń júrýi tegin bolyp qala beretinin aitqan.
Sonymen qatar, kompaniia mamandary respýblikalyq mańyzy bar Qostanai-Nur-Sultan tas jolyn keńeitý múmkindigine qatysty halyqtyń suraǵyna jaýap berdi. Turǵyndardyń atap ótýinshe, atalǵan tar jolmen aýyr júk kólikteri jii júredi. Sonyń saldarynan aimaqta jol apaty jiilep tur.
«Avtomobil joldarynyń memlekettik standartyna sáikes, tórt jolaqty jol táýligine qarqyny 7 myńnan astam kólik júrip ótetin 1-tehnikalyq sanatqa jatady. Qazirgi ýaqytta Qostanai-Nur-Sultan avtojolynyń júktemesi táýligine 5 myń avtomobilden aspaidy. Bul 2 nemese 3-sanattaǵy eki jolaqty jolǵa qoiylatyn talaptarǵa sáikes keledi. Sondyqtan, qosymsha jolaqtar salý týraly sheshim qabyldaý úshin kórsetilgen ýchaskedegi qozǵalys qarqyndylyǵy kem degende 30 paiyzǵa artýy kerek», - dep túsindiredi ulttyq kompaniia mamandary.
Aita ketý kerek, qoǵamdyq tyńdaý barysynda jergilikti turǵyndar «QazAvtoJol» basshylyǵyna joldaǵan usynystaryn hattamaǵa engizýdi talap etken. Atap aitqanda, olar oblys aýymaǵynda aýyl sharýashylyǵy tehnikasynyń, kommýnaldyq qyzmet pen azyq-túlik taýarlaryn tasymaldaityn jáne basqa da jergilikti júk kólikteriniń aqyly joldarmen tegin júrýin qarastyrýdy suraǵan. Turǵyndardyń paiymynsha, mundai jeńildik kommýnaldyq qyzmetter men azyq-túlik baǵasynyń kúrt ósýine tosqaýyl bolady.
