«Nur Otan» partiiasy zeinetaqy jinaqtaryn merziminen buryn alý kezinde 10%-dyq salyq salýdan bas tartýdy usynady, dep habarlaidy QazAqparat.
Memleket basshysy Qasym-Jomart Toqaev óziniń Qazaqstan halqyna Joldaýynda 2021 jyldyń ózinde Biryńǵai jinaqtaýshy zeinetaqy qorynyń 700 myń salymshysy óz jinaǵynyń bir bóligin turǵyn úi alýǵa, emdelýge nemese basqarýshy kompaniialardyń ieligine berýge paidalana alýy mindetin qoidy. El Prezidenti atap ótkendei, bul másele ásirese, dál qazir erekshe mańyzdy. Óitkeni, azamattardyń «áleýmettik ál-aýqaty, eń aldymen, baspana máselesine tikelei bailanysty».
Sonymen qatar, Salyq kodeksine sáikes qazaqstandyqtardyń zeinetaqy jinaqtarynyń merziminen buryn alynǵan bóligine 10 paiyzdyq tabys salyǵy salynatyn bolady.
Osyǵan bailanysty, partiialyq kýrator, Parlament Májilisindegi «Nur Otan» partiiasy fraktsiiasynyń múshesi Artýr Platonov zeinetaqy jinaqtaryn merziminen buryn alý kezinde 10 paiyzdyq salyq salýdy alyp tastaý boiynsha zańnamaǵa ózgerister engizýdi usyndy.
«Nur Otan» partiiasy Memleket basshysynyń bastamasy, eń aldymen, halyqty áleýmettik qoldaýǵa baǵyttalǵan, sondyqtan zeinetaqy jinaqtarynyń bir bóligin paidalaný kezinde erekshe jaǵdailar qarastyrý qajet dep esepteidi.
«Azamattardyń zeinetaqy jinaqtaryn alý kezinde salyq túrinde ustaýǵa josparlanǵan qarajat memlekettiń barlyq ekonomikalyq máselelerin sheshpeidi, biraq turǵyn úi máselesin sheshýde, muqtaj azamattardy emdeýde aitarlyqtai kómek bola alady», - dedi Artýr Platonov.
