Almaty qalasynda «Nur Otan» partiiasynyń qoldaýymen «Otan otbasynan bastalady» atty aqyndar aitysy ótti. Bul aitystyń basty ereksheligi bir otbasynan shyqqan aqyndardyń ózara baq synasýy boldy. Soǵan orai ónersúier qaýym áje men nemere, áke men bala, aǵa men ini siiaqty otbasylyq aitystarǵa kýá boldy.
Aitystyń ashylý saltanatynda «Nur Otan» partiiasy Tóraǵasynyń Birinshi orynbasary Baýyrjan Baibek bul ónerdiń qazaq úshin qashanda orny bólek ekenin aityp, aldaǵy ýaqytta partiia tarapynan aitysqa júieli qoldaý kórsetiletinine toqtaldy.
– Aitys – ejelden kele jatqan asyl muramyz. Bul ónerdiń álem úshin de orny bólek. Sondyqtan IýNESKO aitysty adamzattyń mádeni muralarynyń tizimine qosyp otyr. Aldaǵy ýaqytta «Nur Otan» partiiasy sóz saiysyna júieli túrde qoldaý kórsetedi. Bul – táýelsizdiktiń alǵashqy kúninen bastap aitysty qoldap kele jatqan Elbasy, partiia Tóraǵasynyń tikelei tapsyrmasy, – dedi Baýyrjan Baibek.
Sondai-aq ol tól ónerimizdiń halyqty alańdatqan máselelerdiń oń sheshilýine yqpal etetin qozǵaýshy kúsh ekenin de atap ótti.
– Aitysta qoǵamdaǵy ózekti máseleler ashyq aitylyp, ortaǵa túrli oń usynystardyń tastalatyny belgili. Máselen taiaýda ǵana Qaraǵandyda ótken halyqaralyq aqyndar aitysynda kóptegen utymdy oilar aityldy. Olardyń bárin jergilikti basshylyq eskerip, sol boiynsha naqty jumystardy qolǵa alady dep senemiz. Máslihattardaǵy bizdiń fraktsiianyń músheleri de osyndai aitystarǵa arnaiy kelip, aqyndar kótergen máselelerdi jazyp alyp, olardyń ári qarai oryndalýyn qadaǵalaýǵa alady, – dedi Baýyrjan Baibek.
Sóz barysynda aitystyń taqyrybyna da nazar aýdarǵan ol otbasy men salt-dástúr partiianyń basty qundylyqtarynyń biri ekenin jetkizdi.
– Bul aitystyń taqyrybyn «Otan otbasynan bastalady» dep alýymyzdyń sebebi eń basty qundylyǵymyz otbasy institýtyn odan ári nyǵaityp, sol arqyly eldigimizdi kúsheitý. Óitkeni partiiamyzdyń Doktrinasynda adam, onyń bostandyǵy, zańnyń ústemdigi, ádilettilik siiaqty qundylyqtarmen birge otbasy jáne dástúrge de erekshe mán berilgen. Sondyqtan tól ónerimizge júieli qoldaý kórsetip, iri alaman aitystardy turaqty ótkizip turamyz. Sonyń arqasynda aitys óneri jańa deńgeige kóteriledi dep senemiz, – dedi «Nur Otan» partiiasy Tóraǵasynyń Birinshi orynbasary.
Otbasylyq sóz saiysynda elimizdiń birqatar óńirinen kelgen 7 aqyndar juby óner kórsetti. Atap aitqanda, aitysker ana Egeýhan Muqamádiqyzy (Dáýletkerei Kápulynyń anasy) nemeresi, jas talant Ardakerei Káppen, aqyn Qaiyrtai Aqylbekov uly Rústem Qaiyrtaiulymen, Bekarys Shoibekov inisi (aǵasynyń uly) Dáýren Aqsaqalovpen, Iran-Ǵaiyp Kúzembaev aǵasy Talǵat Kúzembaevpen, Amangeldi Panaberdiev aǵasy Serikbol Panaberdievpen, Bekjan Erjigit aǵasy Erjan Ámirovpen jáne Didar Qamiev inileri Ulanǵasyr, Aidar Qamievtermen aitysty.
Aqyndar otbasylyq qundylyqtar tutas elimizdiń damýyna tikelei áser etetin basty tetikterdiń biri ekenin aityp, erteńimizdiń jarqyn bolýy úshin osy máselege erekshe kóńil bólý kerektigine toqtaldy. Ásirese, bala tárbiesine, jastardy adal eńbekke, otanshyldyqqa baýlýǵa, qoǵamdy masyldyqtan aryltýǵa qatysty utymdy sózder aityldy. Máselen Qamievter aitysynda jastarǵa jyr-dastandardy jattatqyzýdyń mańyzy zor ekeni sóz bolsa, áje men nemere aitysy atalǵan Káp áýletiniń sóz saiysynda táýelsizdiktiń qadir-qasieti keńinen dáripteldi. Al ákeli-balaly Qaiyrtai Aqylbekov men Rústem Qaiyrtaiuly aýyl men qala halqyn alańdatqan máselelerdi túgel qamtyp, jyrǵa qosty. Odan bólek, aqyndar ádemi ázil men qaǵytpa qaljynǵa da oryn taýyp, zalǵa jinalǵan aǵaiynnyń ystyq yqylasyna bólendi.
Nátijesinde áigili teatr jáne kino akteri, Qazaqstannyń Eńbek Eri Asanáli Áshimov bastaǵan qazylar alqasynyń sheshimimen Qaiyrtai Aqylbekov men Rústem Qaiyrtaiulynyń juby bas júlde 3 million teńgeni enshiledi. Ekinshi oryn (2 million teńge) áje men nemere bolyp sahnaǵa shyqqan Káp áýletine buiyrsa, úzdik úshtikti (1 million teńge) aǵaiyndy Qamievter túiindedi. Aitysqa qatysqan basqa da aqyndarǵa qarjylai syi-siiapat kórsetildi.
Osy rette eskere keter jait, kúnniń dúisenbi bolǵanyna qaramastan aitystyń aq saraiy atanyp ketken «Respýblika saraiynda» ine shanshar oryn bolǵan joq. Bul halyqtyń aitysqa degen erekshe mahabbaty men yqylasynyń jarqyn kórinisi ekeni sózsiz.
Aita keteiik, buǵan deiin elimizde «Nur Otan» partiiasynyń qoldaýymen jyldyń sońyna deiin bes birdei alaman aitys ótetini jariialanǵan bolatyn. Almatydaǵy aitys sonyń úshinshisi. Osyǵan deiin Atyraý jáne Qaraǵandy qalalarynda uiymdastyryldy. Endi Nur-Sultan jáne Oral qalalarynda ótpek.
