Qazaqstannyń Oslodaǵy Elshiligi Ekinshi dúniejúzilik soǵys kezinde okkýpatsiiada bolǵan Norvegiiada qaza tapqan qazaqstandyq jaýyngerlerdiń jańartylǵan tizimin jariialady, dep habarlaidy QR SIM baspasóz qyzmeti.
Sońǵy ailarda 12 qazaqstandyq sarbazdyń aty-jóni men jerlengen jeri anyqtaldy. Esimderi belgili qazaqstandyq soldattardyń jalpy sany 56 adam.
Tizimde sarbazdyń týǵan jyly men mekeni, áskerge shaqyrý, qyzmet etý, tutqyndalýy, qaitys bolýy jáne jerlengen jeri, týystary týraly málimetter, sondai-aq qolda bar qujattarǵa siltemeler berilgen. Tizim «Falstad ortalyǵy» (Norvegiia), Qazaqstan aýmaǵynan shaqyrylyp Uly Otan soǵysy kezinde qaza tapqan nemese habarsyz ketken áskeri qyzmetshiler týraly «Memorial» derekter banki, sondai-aq Reseilik «Memorial» jiyntyq derekter banki siiaqty birneshe derekter kózderinen alynǵan aqparatty salystyrý arqyly jasaldy.
«Falstad ortalyǵy» usynǵan aqparat soldattyń jerlengen orny týraly naqty málimetterimen qundy. Reseilik «Memorialda» áskeri tutqyndardyń kartotekasy, al qazaqstandyq «Memorialdyń» málimetteri – Qazaqstandaǵy jaýyngerdiń týǵan jeri men áskerge shaqyrylýy týraly tolyq aqparat bar. Qaza tapqan sarbazdardyń kóbisi bir nemese eki ǵana málimetter bazasynda kórsetilgeni izdeýdi qiyndatady. Kóptegen jaǵdaida soldat esimi men geografiialyq ataýlardyń burmalanyp jazylýy problemasy da bar.
Elshilik Norvegiiada jerlengen qazaqstandyq sarbazdardyń barynsha tolyq tizimin jasaý maqsatynda norvegiialyq «Falstad ortalyǵymen» ózara árekettesýdi jalǵastyrmaq. Búgingi kúnge deiin Norvegiiada jerlengen keńestik áskerilerdiń shamamen 15 500 sany týraly belgili bolyp, olardyń 7 804-tiń esimderi anyqtaldy.
Sonymen qatar, Elshilik Norvegiiadaǵy qaza tapqan qazaqstandyqtardyń taǵdyry týraly basqa da derekkózderden alǵan. Atap aitqanda, jýyrda tabylǵan derekkóz boiynsha 1944 jyly 27 maýsymda Kirkenesti bombalaý kezinde 22 qazaqstandyqtyń qazaǵa ushyraýy týraly aqparat zerttelýde.
2020 jyldyń qańtarynda 44 soldattyń alǵashqy tizimi jariialanǵannan beri tek bir sarbazdyń týysqandary ǵana tabyldy. Elshilik jariialanǵan aqparat sarbazdardyń urpaqtaryn, týystary men jaqyndaryn tabýǵa kómektesedi, zertteýlerdi odan ári júrgizýge jáne soldattardy máńgi este qaldyrýǵa úles qosady dep úmittenedi.
Fotosýrette: Norvegiianyń Tiotta aralyndaǵy Keńestik áskeri zirattaǵy eskertkish.
