Foto: elements.envato.com
Mańǵystaý oblysynyń ákimi Nurlan Noǵaev Kaspiidegi janýarlar men qustardyń jappai qyrylý jaǵdailaryn tekserý jáne aldyn alý úshin ne isteýge nietti ekenin aitty, - dep habarlaidy Tengrinews.kz agenttigi.
"Kaspiide janýarlar men qustar ólip jatyr. Kórshiles Atyraý oblysyndaǵy itbalyqtar, sýquzǵyn, shaǵaladan qus tumaýy anyqtaldy. Keshe Prezident bul máseleni kóterdi. Ekologiia ministrliginiń áreket etý jyldamdyǵyna qaraǵanda, olar basqa ispen qoly bosamai júr deýge bolady. Sizdi Kaspiidiń ainalasynda turatyn janýarlar men qustardyń jappai qyrylýy alańdatady ma? Munyń sebebi nede jáne siz aimaqtaǵy ekologiialyq máselelerdi sheshýge kómektesý úshin bastama kóterýge daiynsyz ba", - dep surady jýrnalist OKQ brifinginde.
Noǵaev bul másele árbir qazaqstandyqty alańdatatynyn aitty.
"Túrli deńgeidegi ákimdikter men Ekologiia ministrligi birlesip jumys istep jatyr. Biz kómek kórsetip jatyrmyz, turǵyndar da bul máselege alańdaýly. Biz osy qubylystardyń aldyn alýǵa jáne saldaryn joiýǵa qarajat bólip, ákimshilik jáne qarjylyq kómek kórsetemiz.
Biraq bul Ekologiia ministrliginiń tikelei mindeti. Bul mindet olarǵa júktelgen. Árbir jaǵdai boiynsha halyqtyń alańdaýshylyǵy seziledi jáne biz osy qubylystardyń aldyn alýdyń kópiri jáne iske asyrýshysy sanalamyz...
Árine, tazalyqta ustaý jáne belgili bir is-sharalardy qabyldaý júrgiziledi, biraq elde ekologiia máseleleri jónindegi quzyretti organ - Ekologiia ministrligi. Olardyń resýrstary da, ǵylymi áleýeti de úlken", - dedi ákim.
Eske salaiyq, 17 maýsymda Qashaǵan ken ornynyń mańynda, "Aqjaiyq" tabiǵi rezervatynda Qyzyl kitapqa engen myńǵa jýyq óli shaǵala tabylǵan edi. Buǵan deiin sýquzǵyndar men júzdegen itbalyqtyń qyrylǵany belgili boldy.
Ekologiia, geologiia jáne tabiǵi resýrstar ministri Serikqali Brekeshev Kaspii men jaǵalaý aýmaǵyna aýqymdy zertteý júrgizýge jáne munai óndirýshi kompaniialardyń ekologiiaǵa áserin tekserýge ýáde berdi.
