«Bekzat – Altyn ul», «Ursań osylai ur!», «Kýbalyq kanvasqa súienbegende, sulap jatar edi», «Apyr-ai, Alash elin bir serpiltkeni-ai»... Áýesqoi boks áleminde sensatsiia jasap, Ekaterinbýrgte álem chempiony atanǵan jas boksshy Bekzat Nurdáýletovke aitylyp jatqan qurmet-qoshemet bul. Onyń qarsylasy on jyl boiy óz salmaǵynda eshkimge des bermegen Kýba qabylany Hýlio Sesar La Krýs edi. Iá, Ádilbek Niiazymbetovke eki márte Olimpiada chempiony atanýǵa kedergi keltirgen sol baiaǵy La Krýs...
«Negizi bapkermen aqyldasqanbyz. La Krýsty qalai jeńýge bolatyny jaily qurama naqty bir taktika ázirledi. Álem chempionatyna barǵan kezde Bekzat pen La Krýs bir-biriniń qatelikterin barynsha ańǵaryp, bilmekke tyrysqany anyq. Bekzattyń La Krýsty ábden zerttegeni kórinip tur. Sebebi, anaý-mynaý emes – boksshymyz Álem chempionatynyń salmaǵyn sezdi», - deidi qos birdei Olimpiadanyń kúmis júldegeri Ádilbek Niiazymbetov.
- Naqty siz belgili bir aqyl-keńes aitqan bolarsyz? La Krýstyń álsiz tusyn bildirdińiz be, bálkim?
- Bekzatqa sáttilik tilep, onyń qarsylasy - baiaǵy La Krýs emes ekenin, birinshi aiqastan bastap kýbalyqtyń sharshap turǵanyn ańǵarttym. Shynynda da, kýbalyqtyń burynǵy qarqyny men aibynynyń joqtyǵyn alǵash kórgen kezde-aq kózinen baiqaǵanmyn.
- La Krýstyń áleýmettik jelide «Ádilbekpen sóilesip turamyz, týǵan qalasyna shaqyratyn. Teńiz jaǵasynda turady eken. Erekshe batyr adamdar turatyn aimaqta óskenin sóz qylatyn, mán bermeppin. Iá, men sol kez mán bermeppin. Keshegi oiynnan soń men Ádilbektiń «men ósken ólkeniń jigitteri shetinen batyr» degen sózin eske aldym. Keshegi meni jeńgen jas jigit Ádilbektiń inisi eken. Ekeýiniń ósken ortasy, mektebi, tálim tergen bapkeri ortaq» degen suhbatynan úzindi tarap júr. La Krýspen shynynda dostyq qarym-qatynastasyz ba? Aqtaýǵa shaqyrǵanyńyz ras pa?
- Ras. Onyń suhbat bergeni de, aralasyp turatynymyz da ras.
- Qalai aralasyp turasyz?
- Kóbinese Instagram arqyly sóilesip turamyz.
- Bekzattyń ónerine qalai baǵa beresiz? Ol pancher me?
- Iá. Ol pancher.
- Bekzattyń bolashaǵy týraly ne aitasyz? Ózińiz qazir qandai qyzmettesiz?
- Bekzattyń bolashaǵy áli alda. Álem chempionatyna barý-barmaýy belgisiz bolyp júrip, Alla jolyn ońǵaryp, aqyry juldyzy jandy, bárimizdi qýantyp tastady. Baǵy men baby qatar shapty, chempion bolyp, elimizge álem birinshiliginen jalǵyz altyn medaldi alyp berdi. Men úshin bul zor mártebe. Bárimiz de Bekzatpen maqtanamyz. Qazaqstannyń, Aqtaý boks mektebiniń mereiin asyrdy. Ekinshiden, kýbalyqty utqannan keiin Bekzattyń altyn medal alatynyna 200 paiyz senimdi boldym. Eń basty qarsylas – osy kýbalyq boksshy boldy ǵoi.
Ózim qazirgi tańda Olimpiadalyq daiarlaý ortalyǵynda qyzmettemin. Kóbinese qaǵaz jumystaryna jaýaptymyn. Ózimiz kezinde Qazaqstannyń namysyn qorǵap Jazǵy Olimpiada oiyndaryna baratyn edik. Endi búgingi kúni basqa sportshylardyń Tokio tórinde sátti óner kórsetýi úshin kúsh salyp jatqan jaiymyz bar. Sportta júrdik. Endi basqa jumystardy da kórý kerek, taný kerek degen oidamyn.
- Ádilbek aǵa, shynyńyzdy aitsańyz, Bekzattyń La Krýsty jeńetinine senimdi boldyńyz ba? Bekzatqa deiin máselen, kýbalyq reseilik boksshyny keleke etkendei, oinap júrip-aq jeńdi. Shyny kerek, Bekzattyń jeńisine kóp adam sengen joq qoi...
- Endi men, utady dep 100 paiyz sengen joqpyn. Biraq, qyrǵyn aiqas bolaryn bildim. Nege deseńiz, kýbalyq maǵan sharshańqy sezildi. Al bizdiń Bekzat jarqyrap kele jatqan jas batyr. Sol sebepten osy joly kýbalyqtyń baǵy taiatynyn sezgendei boldym.
- Alda Tokio Olimpiadasy kele jatyr? Bizdiń boksshylardan ne kútesiz? Naqty boljamyńyz qandai?
- Menińshe, joq degende bizdiń jigitter eki altyn medal alý kerek dep oilap otyrmyn.
- Naqty kimderden altyn medal kútesiz?
- Bekzattan... jáne Abylaihannan (Júsipov) kútem.
- Suhbat bergenińiz úshin rahmet.
Eske sala ketsek, jaqynda Reseidiń Ekaterinbýrg qalasynda bokstan ótken Álem chempionatynda 81 keli salmaqta qazaqstandyq boksshy Bekzat Nurdáýletov jeńimpaz atanǵan bolatyn. Nurdáýletov finalda ózbekstandyq boksshy Dilshodbek Rýzmetovpen judyryqtasyp, tóreshiler sheshimimen 5:0 esebin jeńiske jetti.
QazAqparat
