Rio-de Janeiro qalasynda ótip jatqan Olimpiada oiyndarynda aýyr atletikadan Nijat Rahimov altyn medalǵa ie boldy, dep jazady "Ult aqparat".
Erler arasynda 77 keli salmaqta óner kórsetetin otandasymyz serpe kóterý synynda 165 kelini eńserip, úshinshi orynnan kórindi. Onyń qarsylastary armeniialyq Andranik Karapetian 174 kelini eńserse, qytailyq atlet Liýi Siaotsziýn 177 kelini basynan asyrdy. Osylaisha, alǵashqy básekede jerlesimiz birinshi oryndaǵy sportshydan 12 kelige artta qaldy.
Julqa kóterý synynda qytailyq sportshy 202 kelini baǵyndyryp alǵa shyqqan edi. Alaida Nijat 214 kelini kóterip, jeńisti julyp aldy. Qossaiys qorytyndysy boiynsha otandasymyz 379 kelimen altyn júldeni qanjyǵaǵa bailady.
Qytailyq atlet pen qazaqstandyq sportshy birdei salmaqty eńsergenmen, Nijattyń salmaǵynyń kemdinen jeńis bizdiń ziltemirshige buiyrdy.
Nijat Rahimov – Ázerbaijan eliniń týmasy. Ol 2010 jyly osy eldiń quramasy sapynda Singapýrde ótken jasóspirimder arasyndaǵy birinshi Olimpiialyq oiyndardyń chempiony atansa, 2013 jyly jasóspirimderdiń álem chempionatynda top jardy. Al 2013 jyly Qazanda ótken Ýniversiadaǵa Ázerbaijannyń týyn kóterip baryp, jarysta esh orynsyz qalyp edi. Ol Qazaqstan quramasyna 2014 jyldyń aqpan aiynda keldi.
Nijattyń altyn júldesinen keiin Qazaqstan quramasy jalpy esepte 12-orynǵa kóterildi. Ázirge el quramasy sportshylary 1 altyn, 2 kúmis, 3 qola medalǵa ie boldy.
Ult portaly
