QR Aqparat jáne qoǵamdyq damý ministri Dáýren Abaev Prezidenttiń bankter men mikrokredittik uiymdarǵa qaryz boiynsha aiyppuldar men ósimpuldarǵa tyiym salý týraly tapsyrmasyn túsindirdi, dep habarlaidy QazAqparat.
Qazirgi ýaqytta Qarjy naryǵyn retteý jáne damytý agenttigi, Qazaqstan qarjygerleriniń qaýymdastyǵy, ekinshi deńgeili bankter men mikroqarjy uiymdary halyqty qoldaý boiynsha tiisti sharalardy ázirlep, bekitti.
«Osylaisha, qaryz alýshylar úshin tólem merzimi 2020 jyldyń 16 naýryzy men 15 maýsymy aralyǵynda keiinge shegeriledi. Qaryz boiynsha tólemderdi keiinge shegerý múmkindigi osyǵan muqtaj adamdarǵa berilmek. Máselen, karantinniń engizilýi sebepti jumysynan airylǵandar, aqy tólenbeitin eńbek demalysyna shyqqandar, jalaqysy qysqarǵandar nemese toqtatylǵandar jáne t.b. Ózderińiz túsingendei, negizdemelerdiń basym kópshiligi tótenshe jaǵdai rejimine qatysty bolmaq», - dedi ministr «Habar 24» telearnasynyń tikelei efirinde.
Qosymsha qujattarsyz bul shegerý sharasy resmi túrde tirkelgen jumyssyzdarǵa, AÁK alýshylar jáne halyqtyń áleýmettik áljýaz toptaryna qatysty qoldanylady.
Sonymen birge, nesielik uiymdar atalǵan tulǵalardyń tizimderin kredittik biýrolardan alady.
Bul shara kásipkerlerge de qatysty bolady. Mysaly, taýar satylymy men kórsetiletin qyzmet kólemi azaiýy sebepti qarjylyq jaǵdaiy nasharlaǵan, tutynýshylar tólemi keshikken jáne t.b. sebeptermen kásipkerler tólemderin keiinge shegerý múmkindigin ala alady.
Eske sala ketsek, qazirgi ýaqytta koronavirýs infektsiiasymen Nur-Sultan qalasy boiynsha 60 adam, Almaty qalasynda – 48 adam, Qaraǵandy qalasynda - 4, Jambyl oblysynda -3 adam, Atyraý oblysy - 3 adam, Shymkent qalasynda - 2 adam, Almaty oblysynda - 1 adam, Aqtóbe oblysynda - 1 adam, Soltústik Qazaqstan oblysynda - 1 adam, Aqmola oblysynda - 1 adam, Pavlodar oblysynda - 1 adam, jalpy 125 naýqas tirkeldi.
