Foto:EPA/Vostock-photo
Áleýmettik jelilerde Nepalda qulaǵan ushaq bortynan túsirilgen video taralyp jatyr. Jolaýshylardyń biri qaiǵyly oqiǵa aldynda Facebook-te tikelei efirge shyǵyp otyrǵan, - dep habarlaidy Tengrinews.kz portaly.
"Úndistan týmasy - Soný Jaisval (Sonu Jaiswal) esimdi 35 jastaǵy azamat Facebook arqyly tikelei efirge qosylyp, Yeti Airlines áýekompaniiasy ushaǵy apatqa ushyraǵan sátti túsirip alǵan, ol ózi jáne taǵy 67 adam qaza tapty", - dep habarlaidy Twitter-de El Dato Noticias Morelos arnasy.
Er adam ózin, ainalasyndaǵy jolaýshylardy jáne terezedegi kórinisti videoǵa túsirip alǵan. Kadrlarda ushaq tómendei bastaǵanyn kórýge bolady. Barlyq jolaýshynyń kóńil kúii kóterińki bolǵan. Kenetten aiqai estilip, videoda jaǵdai kúrt ózgeredi. Er adamnyń kamerasyna jazylǵan sońǵy nárse - sharpyǵan jalyn, syqyrlaý jáne metall qurylymynyń synyqtary.
Eske salaiyq, jeksenbide ATR 72 týrbovintti jolaýshylar ushaǵy Pokhara qalasynyń eski jáne jańa áýejailary arasynda apatqa ushyrady. Jergilikti Yeti Airlines áýekompaniiasyna tiesili ushaq Katmandýdan Pokharaǵa ushyp kele jatqan.
Áýekompaniiasynyń ókili bortta 68 jolaýshy men tórt ekipaj múshesi bolǵanyn rastady. Bastapqyda ushaqtyń barlyq jolaýshysy men ekipaj músheleri qaza boldy dep habarlandy, biraq keiinirek sheneýnikter tiri qalǵandar baryn aitty. Olar aýrýhanaǵa jatqyzylǵan, alaida qansha adam ekeni belgisiz.
Apatqa ushyraǵan ushaqtyń 15 jolaýshysy - sheteldik. Jolaýshylar arasynda 53 nepaldyq, 5 úndi, 4 orys, 2 korei, sondai-aq Irlandiia, Argentina, Aýstraliia jáne Frantsiiadan kelgen azamattar bolǵan. Al QR SIM jolaýshylar arasynda qazaqstandyqtar bolmaǵanyn habarlady.
