«BioNTech» nemis biotehnologiialyq kompaniiasynyń bas direktory Ýgýr Shahin kompaniianyń 12 jastan asqan balalarǵa arnalǵan COVID-19 vaktsinasyn daiyndaýdyń sońǵy satysynda ekenin habarlady, dep jazady "Ult aqparat".
Nemis buqaralyq aqparat quraldaryna bergen suhbatynda ǵalym ázirlengen vaktsina biylǵy jyldyń maýsym aiynda Eýropada 12-15 jas aralyǵyndaǵy balalarǵa qoljetimdi bolatynyn aitty. Qazirgi tańda Eýropalyq dári-dármek agenttiginde preparatty maquldaý týraly ótinish daiyndalýda.
Eýropa Odaǵynyń retteýshi organynyń baǵalaýy orta eseppen tórt-alty aptaǵa sozylady deidi Ý. Shahin.
Nemis ǵalymdarynyń pikirinshe, balalardy vaktsinalaý ujymdyq immýnitetti alýda jáne COVID-19 pandemiiasyn toqtatýda mańyzdy qadam retinde qarastyrylady.
Kelesi oqý jylyna deiin eresek balalardy vaktsinalaý, balalaryn úide oqytýdyń qolaisyzdyǵyna tap bolǵan ata-analarǵa qysymdy tómendetedi.
«Balalardyń qalypty mektep ómirine qaita oralýyna jáne olardyń otbasymen jáne dostarymen kezdesýine múmkindik berý óte mańyzdy», – dedi Ý.Shahin.
«BioNTech» biotehnologiialyq kompaniiasy jáne onyń seriktesi «Pfizer» Amerika Qurama Shtattarynda 12 jastan 15 jasqa deiingi balalarǵa vaktsinaǵa ruqsat alýǵa ótinish berdi. 16 jastan asqan jasóspirimder eresekterge arnalǵan eki inektsiialyq vaktsinany qabyldai alady.
2021 jyldyń naýryzynda óndirýshiler 12-15 jas aralyǵyndaǵy balalarǵa arnalǵan vaktsinanyń klinikalyq synaqtarynyń sońǵy kezeńi aýrýdyń aldyn alýda 100% tiimdi ekenin kórsetti.
Eresekterge arnalǵan Pfizer vaktsinasynyń qazirgi nusqasy minýs 70 gradýs temperatýrada saqtalýy kerek. Alaida Pfizer ótken aptada standartty muzdatqyshta saqtaýǵa bolatyn «Comirnaty»-diń jańa nusqasyn josparlap otyrǵanyn aitty.
