Qazaqstan Prezidenti Nursultan Nazarbaevtyń qurmetine atalǵan hrizantema gúli Japoniiada «Mártebeli» ataǵyna ie boldy. Bul týraly QR Syrtqy ister ministrliginiń baspasóz qyzmetinen málim etti, dep habarlaidy QazAqparat.
Japoniiada 9 qyrkúiek Hrizantema merekesin toilaidy jáne qarasha aiy dástúrli maýsymnyń ulttyq gúli bolyp sanalady. Búkil el boiynsha saiabaqtar men hramdarda ótetin Hrizantema festivalinde hrizantemanyń barlyq pishinderi men myńdaǵan túrleri usynyldy. Osy jyly japon qoǵamdastyǵyna alǵash ret «Prezident Nazarbaev» dep atalatyn hrizantema surypy usynyldy.
Bul gúl 2016 jyly Memleket basshysynyń Japoniiaǵa jasalǵan resmi sapary barysynda ósirilip, tanystyrylǵan bolatyn. «Prezident Nazarbaev» hrizantemasy 2 metrge deiin jetetin biiktigi men tyǵyz ornalasqan kúltelerimen adamnyń basyna teń keletindei sary túineginiń kólemimen erekshelenedi. Sary hrizantema Japoniianyń simvoly bolyp tabylady jáne imperator taǵy men osy el azamattarynyń ulttyq pasporttaryn áshekeleitin memlekettik gerbin bildiredi.
Elbasyn qurmetine orai atalǵan gúl ártúrli baiqaýlar men festivalderde júldeli oryndarǵa ie bolyp, florister men áýesqoilar arasynda keńinen tanylyp otyr. Atap aitqanda, 6 qarashada Izými qalasynda (Osaka prefektýrasy) ótken Japoniianyń Hrizantema festivalinde 300 myńǵa jýyq gúldiń arasynda «Prezident Nazarbaev» hrizantemasy Japoniia Bilim, mádeniet, sport, ǵylym jáne tehnologiialar ministriniń, sondai-aq Jalpy ulttyq isteri jáne kommýnikatsiialar ministriniń arnaiy syilyǵyn ielendi.
Sondai-aq, Tokio Úkimetiniń qoldaýymen 7 qarashada Japoniianyń Hrizantema áýesqoilary qaýymdastyǵy Hibiia ortalyq saiabaǵynda uiymdastyrǵan 95-shi Tokio hrizantema festivalinde «Prezident Nazarbaev» gúli «Mártebeli» ataǵyna ie boldy.
Buǵan deiin hrizantema suryptaryna memleket basshylarynyń esimderi berilmegen. Olarǵa «Shyǵys jeli», «Patsha», «Bes imperator» siiaqty lirikalyq sipattaǵy jalpylama ataýlar qoiylyp kelgen.
