Elbasy memlekettik tildi latyn qarpine kóshirý jónindegi jobany iske asyrý úshin qurylǵan jumys tobynyń múshelerimen kezdesti, dep habarlaidy "Ult aqparat" Aqordaǵa silteme jasap.
Jiynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵai standartynyń jobasy usynyldy.
Qazaqstan Prezidenti memlekettik tildi reformalaý rýhani jańǵyrý baǵdarlamasy aiasyndaǵy mańyzdy máselelerdiń biri ekenin atap ótti.
– Bul kúnderi qazaq tiliniń jańa álipbiine bailanysty másele qoǵamda qyzý talqylanýda. Oǵan kóptegen adam qatysty. Latyn qarpine kóshý týraly ideia biz táýelsizdik alǵan kezden týyndaǵan bolatyn. Qazaq jazýynyń latyn qarpine kóshýi árdaiym meniń airyqsha baqylaýymda boldy, – dedi Nursultan Nazarbaev.
Osy rette, Elbasy latyn qarpine kóshý úderisiniń tarihi máni bar ekenine toqtalyp, bul máseleni birlese sheshý qajettigin aitty.
– Álemde eshbir el óziniń jańa álipbiin búkil halyq bolyp osylaisha talqylaǵan emes. Biz úshin árbir adamnyń pikirin bilý mańyzdy. Latyn qarpine kóshýge bailanysty Prezident Ákimshiligine 300-den astam ótinish kelip tústi. Jastardyń bul úderisti qoldaǵany qýantady, – dedi Memleket basshysy.
Nursultan Nazarbaev qazaq tiliniń jańa álipbiiniń jobasyn talqylaýǵa jetekshi qoǵamdyq birlestikterdiń, ǵylymi orta men jurtshylyqtyń belsendi túrde atsalysqanyna nazar aýdardy.
Kezdesý barysynda Qazaqstan Prezidentine atqarylǵan jumystardyń nátijeleri jóninde A.Baitursynov atyndaǵy Til bilimi institýtynyń direktory E.Qajybek jáne Sh.Shaiahmetov atyndaǵy Tilderdi damytýdyń respýblikalyq úilestirý-ádistemelik ortalyǵynyń direktory E.Tileshov baiandady.
Elbasy jiynǵa qatysýshylardyń esebi men pikirlerin tyńdap, airyqsha mán berýdi qajet etetin jekelegen máselelerge toqtaldy.
– Jalpy, atqarylyp jatqan jumystardyń negizgi baǵyttaryn qoldaimyn. Jobany iske asyrý barysynda álemdik tájiribe eskerildi. Bul óte mańyzdy. Sonymen birge, qazaq álipbiin latyn qarpine kóshirý úderisine qatysty aqparattyq-túsindirý jumystaryn jalǵastyrý qajet, – dedi Memleket basshysy.
Qazaqstan Prezidenti bul reforma basqa tilderdiń damýyna nuqsan keltirmei, azamattardyń quqyqtaryn buzbaýǵa tiis ekenine erekshe toqtaldy.
– Qazaq tiliniń latyn qarpine kóshýi orys tildi azamattardyń quqyqtaryn, orys tili men basqa da tilderdiń múmkindikterin shektemeidi. Orys tiliniń kirill qarpinde qoldanylýy ózgerissiz qalady. Ol burynǵydai qyzmet atqara beretin bolady. Jańa álipbige kóshý qazaq tilin meńgerýdi jeńildetedi, – dedi Nursultan Nazarbaev.
Elbasy latyn qarpine kóshý kúrdeli úderis ekenin, sondai-aq onyń maqsaty tilimizdi damytý jáne ony álemdik aqparattyq keńistikke shyǵarý úshin jaǵdai jasaý bolyp tabylatynyn atap ótti.
Budan bólek, Memleket basshysy jańa álipbidi bilim berý júiesine engizý úshin muǵalimder men ádistemelik bazany daiyndaý qajettigin aityp, Úkimetke ony kezeń-kezeńimen engizý jónindegi jospar ázirleýdi tapsyrdy.
Sońynda Nursultan Nazarbaev qazaq álipbiin reformalaýǵa qoldaý bildirip, ony iske asyrýǵa belsendi atsalysqan barsha qazaqstandyqtarǵa, ǵalymdar men tiltanýshylarǵa alǵys aitty.
