QR Tuńǵysh Prezidenti Nursultan Nazarbaev Joǵary Eýraziialyq ekonomikalyq keńestiń otyrysyna qatysty, dep habarlaidy "Ult aqparat" elbasy.kz saityna sillteme jasap.
Jiynda Eýraziia ekonomikalyq odaǵy qyzmetiniń ózekti máseleleri, 2021 jyldaǵy yntymaqtastyq qorytyndylary, sondai-aq Odaqqa múshe elderdiń aldaǵy kezeńdegi ózara ekonomikalyq yqpaldastyǵyn damytý jospary talqylandy.
Joǵary Eýraziialyq ekonomikalyq keńestiń Qurmetti tóraǵasy óz sózinde pandemiia men daǵdarystardy eńserý, esh shekteýlersiz ortaq ishki naryq qaǵidattaryn saqtaý, sondai-aq qazirgi zamanǵa sai damýdyń jańa baǵyttaryn aiqyndaý úshin birlesken sharalar qabyldaý qajettigin atap ótti. Sonymen qatar Elbasy Eýraziia ekonomikalyq odaǵy aýmaǵynda importty almastyratyn baǵdarlamalar ázirleý múmkindigin aityp, bul qadam integratsiialyq birlestikke múshe elderdiń azamattary úshin jańa jumys oryndaryn ashýǵa yqpal etetinine nazar aýdardy.
«Búginde Eýraziia ekonomikalyq odaǵyna múshe memleketterdiń ekonomikalyq belsendiligin arttyrý jumystaryn kúsheitý qajet. Jahandyq senim daǵdarysy men geosaiasi shielenis jaǵdaiynda Odaqty saqtap qalýdyń jáne nyǵaitýdyń mańyzy zor. Ol jańa qatysýshylarǵa ashyq ári basqa integratsiialyq birlestiktermen yntymaqtastyqqa daiyn. Tek barlyq taraptyń úilesimdi kúsh-jigeri bizdiń ekonomikalarymyzdyń ósimin qalpyna keltirýdiń kilti bolyp sanalady», – dedi Nursultan Nazarbaev.
Elbasy Qazaqstannyń Eýraziia ekonomikalyq odaǵyna tóraǵalyǵyn qorytyndylai kele, Ózbekstanǵa baiqaýshy memleket mártebesi berilgenin jáne Eýraziialyq ekonomikalyq komissiia men Shanhai yntymaqtastyq uiymy hatshylyǵy arasyndaǵy ózara túsinistik týraly memorandýmǵa qol qoiylǵanyn quptaitynyn atap ótti. Sondai-aq Nursultan Nazarbaev Ázerbaijan Respýblikasyn Eýraziia ekonomikalyq odaǵyna baiqaýshy memleket retinde shaqyrý múmkindigi týraly aitty.
Qazaqstannyń Tuńǵysh Prezidenti Eýraziia ekonomikalyq odaǵynyń Eýropalyq odaqpen, Shanhai yntymaqtastyq uiymymen jáne Túrki memleketteri uiymymen yntymaqtastyǵyn odan ári nyǵaita túsý úshin «Úlken Eýraziia» tórtjaqty ekonomikalyq forýmyn qurýdy usyndy.
