Elbasy Túrkistanǵa saparynyń qorytyndysy boiynsha otandyq jáne sheteldik BAQ ókilderi úshin brifing ótkizdi. Jýrnalister aldynda sóilegen sózinde qala aýmaǵynda qarqyn alǵan qurylys jumystarynyń aýqymyn atap ótti, dep jazady elbasy.kz.
«Ótken jyly oblys ortalyǵyn kóshirý týraly jarlyqqa qol qoiǵan soń aýqymdy qurylysty bastadyq. Búgin men orasan zor ǵimarattardy aralap kórdim. Kóptegen jańa nysandar boi kóterip, jastar úshin jumys oryndary ashylyp jatyr. Aýrýhanalar, mektepter, qonaq úiler, halyqaralyq áýejai salynady. Sý resýrstarymen qamtý salasyndaǵy máselelerdi sheshý josparlanǵan», - dedi Nursultan Nazarbaev.
Sonymen qatar, Qazaqstannyń Tuńǵysh Prezidenti ákimdiktiń infraqurylymdyq jobalardy júzege asyrý josparlary týraly aitty.
«Bir jyl ishinde kóptegen jumys isteldi. Kelesi jyly Ózbekstan, Qyrǵyzstan, Túrkimenstan, Tájikstan basshylaryn sammitke shaqyrýdy josparlap otyrmyz. Eger olar qatysýdy rastasa, biz ony Túrkistanda ótkizýimiz múmkin. Búkil Qazaqstan jurtshylyǵy Túrkistannyń damýyn qoldap otyr. Árbir úi, árbir qala – bul Qazaqstannyń bailyǵy. Elordany salǵan kezde qarjylandyrýǵa bailanysty suraqtar bolǵan edi. Endi Nur-Sultan qalasy barlyq shyǵyndardy ótep, jyl saiyn biýdjetke trilliondaǵan kiris ákelip otyr», - dedi Elbasy.
Sonymen birge, Nursultan Nazarbaev Túrkistan men búkil óńirdiń týristik áleýetin damytýdyń mańyzdylyǵyn atap ótti.
«Biz munda kóptep týristerdi tartýymyz kerek. Búkil túrki álemi Túrkistandy ortalyq dep sanaidy. Týrizm – ekonomikanyń mańyzdy bóligi. Munda kóptegen murajailar bar. Qazir «Kúltóbe qalashyǵy» arheologiialyq parkin qurý jumystary júrgizilýde», - dedi Qazaqstannyń Tuńǵysh Prezidenti.
