Konfessiiaaralyq jáne órkenietaralyq dialogty damytý jónindegi N.Nazarbaev ortalyǵy Pákistanda «Beibitshilik pen kelisim jolyndaǵy konfessiiaaralyq jáne órkenietaralyq dialog» taqyrybynda halyqaralyq dóńgelek ústel ótkizdi, dep habarlaidy QazAqparat.
Is-shara QR Táýelsizdiginiń 30 jyldyǵy men Álemdik jáne dástúrli dinder liderleri sezi hatshylyǵynyń aldaǵy XIX otyrysyn aqparat alańynda keńinen nasihattaý maqsatynda uiymdastyryldy. Islamabadta ótken jiynǵa QR Syrtqy ister ministrligi men QR Aqparat jáne qoǵamdyq damý ministrligi qoldaý kórsetti. Qazaqstannyń Pákistan Islam Respýblikasyndaǵy Elshiligi de kómek kórsetti.
Dóńgelek ústeldiń moderatory Álemdik jáne dástúrli dinder liderleri sezi hatshylyǵynyń qatysýshysy, Pákistannyń Islamdyq zertteýler institýtynyń bas direktory-Mýhammad Ziia ýl-Hak álemde bolyp jatqan ultaralyq jáne dinaralyq qaqtyǵystar aiasynda konfessiiaaralyq dialogty nyǵaitýdyń mańyzyn atap ótti.
«Adamzat barlyq din ókilderi jumyla birlesip, kúsh-jigerin biriktirgende ǵana jeńe alatyn ortaq qaýip-qaterge tap bolady. Osy tusta Qazaqstan usynyp otyrǵan bastamalar teńdessiz sipatqa ie. Qazaqstan zamanaýi qoǵam bolmysyn túsine otyryp, memlekettiń ulttyq brendine jáne rýhani, mádeni simvolyna ainalǵan biregei alań - Álemdik jáne dástúrli dinder liderleriniń sezi aiasynda barlyq eldermen odan ári dialogty damytýǵa nietti ekeni qýantady», - dedi Muhammed Ziia ýl-Hak óz sózinde.
Konfessiiaaralyq kelisimdi saqtaýdaǵy qazaqstandyq tájiribe taqyrybyn Qazaqstannyń Pákistandaǵy Tótenshe jáne Ókiletti Elshisi Erjan Kistafin jalǵastyrdy.
«El Táýelsizdiginiń 30 jylynda Qazaqstan dinaralyq damýdyń ózindik biregei modelin qalyptastyryp úlgirdi. Barlyq órkeniet, dinder men mádenietter arasyndaǵy ózara is-qimyldyń mańyzdy býyny bola otyryp, Qazaqstan túrli dinder men konfessiia ókilderin Álemdik jáne dástúrli dinder liderleri seziniń bir alańynda biriktire aldy», - dedi E.Kistafin.
Sonymen qatar, Elshi Qazaqstan men Pákistan arasyndaǵy dinaralyq jáne órkenietaralyq dialog baǵytyndaǵy qarym-qatynastyń perspektivalyq baǵyttaryna toqtaldy.
«Qazaqstan men Pákistan diplomatiialyq qarym-qatynas ornatqan 29 jyl ishinde álemdik problemalarǵa birlesken irgeli kózqaras qalyptastyrýy konfessiiaaralyq dialogty odan ári tiimdi damytýdaǵy dostyq niettiń aiqyn kórinisi», -dedi E. Kistafin.
N.Nazarbaev ortalyǵynyń basqarma tóraǵasy Bolat Sársenbaev osy jyldyń 5-6 qazan kúnderi Nur-sultan qalasynda ótetin sezdiń XIX hatshylyǵyna jáne QR Parlamenti Senatynyń spikeri – Álemdik jáne dástúrli dinder liderleri sezi hatshylyǵynyń basshysy M.Áshimbaevtyń tóraǵalyǵymen ótetin jumys tobyna daiyndyq jumystaryn uiymdastyrý týraly, sezdiń strategiialyq mindetteri týraly aqparatpen bólisti.
«Búginde ortalyq qyzmetiniń basym baǵyttarynyń biri - XIX sez hatshylyǵy qarsańynda konfessiiaaralyq damý máseleleri boiynsha saraptamalyq pikir jáne tájiribe almasýǵa, sez ideialaryn ilgeriletýge baǵyttalǵan birqatar halyqaralyq dóńgelek ústelder ótkizý bolyp sanalady. Osyndai is-sharany uiymdastyrý álem jurtshylyǵynyń, ǵylymi-zertteý ortalyqtarynyń, halyqaralyq jáne respýblikalyq BAQ-tyń nazaryn mańyzdy máselelerge aýdarýǵa múmkindik beretinine bek senimdimin», - dedi B.Sársenbaev.
Konfessiiaaralyq jáne órkenietaralyq dialogty damytý jónindegi N.Nazarbaev ortalyǵy baspasóz qyzmetiniń málimetinshe, Álemdik jáne dástúrli dinder liderleri seziniń negizgi ideialaryn, maqsattary men mindetterin nasihattaýǵa arnalǵan halyqaralyq dóńgelek ústelder seriiasy Shveitsariia, Chehiia, Saýd Arabiiasy, Armeniia, Vengriia, Germaniia, Iran, Kanada, Qyrǵyzstan, Malaiziia, Túrkiiada josparlanǵan.
